Jańa jyldan bastap kúshine enetin Ákimshilik kodekske 90-nan astam túzetý engiziledi
ASTANA. QazAqparat - Búgin Parlament Májilisiniń jalpy otyrysynda palata depýtattary «Ákimshilik quqyq buzýshylyq týraly kodekske ózgerister men tolyqtyrýlar engizý týraly» zań jobasyn eki oqylymda maquldady. Atalǵan qujat birqatar Májilis depýtattarynyń bastamashylyǵymen ázirlengen.
Májilis depýtaty Arman Qojahmetovtiń aıtýynsha, zań jobasyn ázirleýge birqatar sebepter túrtki bolyp otyr. «Atap aıtqanda, 2015 jyldyń 1 qańtarynan jańa Ákimshilik quqyq buzýshylyq týraly kodeksi kúshine enetini belgili. Bul kodekske Elbasy 2014 jyldyń 5 shildesinde qol qoıǵan bolatyn. Al aǵymdaǵy jyldyń sáýir aıynan búginge deıin Parlament 2001 jyldan beri qoldanysta bolǵan Ákimshilik Kodekske birqatar ózgerister men tolyqtyrýlar engizgen edi», - dedi depýtat Arman Kojahmetov.
Onyń sózine qaraǵanda, qazirdiń ózinde Parlamentte Ákimshilik kodekske túzetý engizetin zań jobalary qaralyp jatyr. Soǵan oraı, engiziletin túzetýlerdiń barlyǵyn jańa kodekske der ýaǵynda engizý máselesi kózdelip otyr. Jalpy alǵanda jańa Kodekske 90-ǵa jýyq túzetý engizý kózdeledi.
Májilis maquldaǵan zań jobasy Parlament Senatyna joldanady.
