Jańa jylda jalǵyz baspanasy órtengen aqtóbelik otbasy dalada qaldy
AQTÓBE. QazAqparat - Aqtóbede baspanasy órtengen 7 jan dalada qaldy. Úsh aı buryn nesıege satyp alynǵan úı turýǵa jaramsyz, dep habarlaıdy QazAqparat tilshisi.
Aqtóbe qalasyndaǵy saıajaılardyń birinde 31 jeltoqsannan 1 qańtarǵa qaraǵan túni úı órtendi. Jalǵyz baspanasynan aıyrylǵan 7 jan qazir týma-týystarynyń úıin jaǵalap júr.
«31 jeltoqsannan 1 qańtarǵa qaraǵan túni saǵat 1:00 men 3:00 arasynda úıimiz órtenip ketti. Sol kúni biz Jańa jyl merekesin qarsy alý úshin qonaqqa barǵan edik. Úıde eshkim bolmady. Órttiń qaıdan shyqqanyn da bilmeımiz. Ózimiz úıdi gazben emes, qatty otynmyn jylytamyz. Tek qujattarymyzdy alyp úlgerdik. Úsh bólmeli úıdiń shatyry túgel janyp, ortasyna tústi. Qazir ony jóndeý múmkin emes», - dedi úı ıesi Salamat Jetigenov. Ol anasy, aǵasy, qaryndasy jáne óziniń eki balasymen birge turady. Jubaıy úshinshi sábıine júkti.
«Biz uzaq jyldar boıy páter jaldap kelgenbiz. Úsh aı buryn bankten nesıe rásimdep, sol aqshaǵa baspana satyp alǵan edim. Qazir úısiz qalyp, nesıeni tóleýge májbúr bolyp otyrmyn. Ákimdik qyzmetkerleri kelip, sýretke túsirip ketti. Ózge habar joq», - dedi Salamat Jetigenov.
Órt sóndirýshilerge habar 1 qańtar kúni saǵat 03:23-te túsken.
«Órt sóndirý jáne avarııalyq-qutqarý jumystary qyzmeti, arnaıy tehnıka jáne jergilikti polıtsııa qyzmetkerleri jiberildi. Órt 03:56 mınýtta aýyzdyqtalyp, 04:07-de sóndirildi. Órttiń shyǵý sebebi men shyǵyny anyqtalyp jatyr», - dep habarlady oblystyq TJD baspasóz qyzmeti.
