Jańa jylda tórt kúnge salat ázirleýdiń qajeti joq - QR Bas sanıtar-dárigeri
ASTANA. QazAqparat - QR Densaýlyq saqtaý mınıstrligi Qoǵamdyq densaýlyq saqtaý komıtetiniń tóraǵasy Jandarbek Bekshın jańajyldyq as mázirine qatysty paıdaly aqyl-keńestermen bólisti, dep habarlaıdy QazAqparat tilshisi
«Birinshiden, jańajyldyq merekege jemis-jıdek pen kókónisterdi kóbirek alý qajet. Kókónisterge jeńil et ónimderin, máselen taýyq etin qosýǵa bolady. Aýyr et taǵamdaryn múmkindiginshe azyraq tutynǵan jón. Tátti taǵamdar men tort, gazdalǵan tátti sýsyndardan da aınalyp ótýge tyrysyńyz», - dep atap ótti Jandarbek Bekshın Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, qańtar aıynda bolatyn tamaqtan ýlanýdyń elý paıyzy jańajyldyq merekeden qalǵan tamaqty jeýge qatysty.
«Jańa jylda syrqattanyp, tamaqtan ýlanyp qalmaý úshin tórt kúnge jetetin asta-tók tamaq ázirlemeý kerek. Máselen, maıonezi bar salatty bir táýlikten keıin jeýge bolmaıdy, qoqysqa tastaý kerek. Sebebi maıonez - epıdemıologııalyq qaýipti ónim, bakterııalardyń naǵyz qorektik ortasy. Salatqa maıonezden góri ósimdik maılaryn qosý anaǵurlym tıimdi. Dastarhanǵa qoıylǵan jemis-jıdek, alma, júzimder men jańǵaqtar ústelińizdi jaınatyp qana qoımaı, jańa jylǵa myqty densaýlyqpen qadam basýyńyzǵa da múmkindik beredi», - dep túıindedi Jandarbek Bekshın.
