Jańa jylda QR soltústiginde 32º-qa deıin aıaz bolady, ońtústikte - kóktaıǵaq, jylbysqy qar jaýady
ASTANA. QazAqparat - Jańa jylda kúrdeli meteorologııalyq jaǵdaı kútilýde, dep habarlady «Qazgıdromet» RMK 31 jeltoqsan men 2016 jylǵy 2 qańtar aralyǵyna bergen boljamynda.
Kaspıı ońtústiginde qalyptasqan tsıklon Qazaqstan aýmaǵy arqyly soltústik-shyǵys baǵytqa aralasady, soǵan oraı respýblıkanyń barlyq óńirinde boran soǵyp, qar jaýady dep kútilýde. Jeldiń kúshi 18-28 m/s-qa jetedi, joldardy qar basady.
Ońtústikte jaýyn-shashyn, jylbysqy qar jaýady, tuman túsip, kóktaıǵaq, jeldiń kúshi 15-25 m/s-qa jetedi.
Sonymen qatar Reseıdiń Eýropa bóliginiń soltústiginde qalyptasqan sýyq antıtsıklon Batys Sibirge aýysady. Onyń yqpaly Qazaqstannyń soltústik oblystaryna taralady, sonyń saldarynan túnde temperatýra 23-32º deıin tómendeıdi.
