Jańa jyl túninde joǵalǵan aqmolalyq áıel tabyldy

KÓKShETAÝ. QazAqparat - Jańa jyl túninde jumbaq jaǵdaıda joǵalǵan Arshaly aýdanynyń turǵyny 27 jastaǵy áıel tabyldy, dep habarlaıdy QazAqparat tilshisi.

Aqmola oblystyq PD baspasóz qyzmetiniń málimetinshe, Arshaly aýdanynyń turǵyny 27 jastaǵy áıel jeltoqsannyń 31-de túngi saǵat 12:00 shamasynda jumbaq jaǵdaıda joq bolyp ketken. Kúıeýiniń sózinshe, áıel úıinen shyǵyp, qaıtyp oralmaǵan.

«Arshaly aýdandyq PB krımınaldyq polıtsııa bóliminiń qyzmetkerleri bıylǵy jylǵy qańtardyń 1-de jedel-izdestirý is-sharalary barysynda joǵalǵan áıeldi Nur-Sultan qalasyndaǵy qurbysynyń úıinde tapty. Onyń densaýlyǵy men ómirine esh qaýip tónip turǵan joq. Oqıǵanyń sebebi anyqtalýda. Polıtsııa 1-shi qańtar kúni áıeldi turǵylyqty jeri boıynsha otbasyna aman-esen qaıtardy», - dedi vedomstvodan.