Jańa jyl túninde «Sulpak» dúkenin tonamaq bolǵan ury sottaldy
ALMATY. QazAqparat-Almatyda 2017 jyldyń 31 jeltoqsanynda Jańa jyl túninde «Sulpak» dúkenin tonamaq bolǵan uryǵa qatysty sot úkimi shyqty, dep habarlaıdy QazAqparat tilshisi.
Ol dúkennen turmystyq tehnıkalardy urlamaq bolǵan. Atalǵan is boıynsha qylmystyq is Áýezov aýdandyq sotynda qaralyp, QR KQ 24-babynyń 3-bóligi, 188-babynyń 1-bóligi boıynsha úkim shyqty.
Tergeýshilerdiń málimetine súıensek, sottalýshy 2017 jyldyń 31 jeltoqsanynda saǵat 23-48-de ustalǵan. Ol «Sulpak» dúkeniniń shatyryna shyǵyp, temir aramen aralap, ınstallıatsııalyq qubyr men kondıtsıonerdiń elektr kabelin ǵana urlap úlgergen. Onyń jymysqy oıynyń tolyqtaı júzege asýyna polıtsııa kedergi keltirgen. Oqıǵa ústinde qolǵa túsken ury barlyq kinásin moıyndaǵan.
«Sottalýshy kinásin tolyǵymen moıyndady. Sot QR KQ 24-babynyń 3-bóligi, 188-babynyń 1-bóliginde kórsetilgen qylmysty jasaǵany úshin onyń bas bostandyǵyn 1 jyl 6 aıǵa shekteý týraly úkim shyǵardy. Alaıda, QK-tiń 62-babynda kórsetilgendeı, tergeý amaly kezinde 1 aı qamaýda bolǵany eskerilip, bas bostandyǵynan shekteý merzimi 1 jyl 5 aı 7 kúnge qysqartyldy. Úkimde ony 180 saǵat májbúrli túrde jumysqa tartý sharasy kórsetilgen. Ol atqarýshy organ belgilegen jerde eńbek etetin bolady», - delingen sot habarlamasynda.
