Jańa jyl túninde Qazaqstanda tótenshe oqıǵalar bolǵan joq
ASTANA. QazAqparat - Qazaqstanda Jańa jyldy qarsy alý kezinde tótenshe oqıǵalar bolǵan joq, dep habarlaıdy QazAqparat QR ІІM Tótenshe jaǵdaılar komıtetiniń resmı ókili Rýslan Imanqulovqa silteme jasap.
«Bizdegi málimetterge sáıkes, aıtarlyqtaı tótenshe oqıǵalar tirkelgen joq», - dedi R.Imanqulov agenttik tilshisiniń saýalyna.
Sonymen birge, Astana qalasynda da Jańa jyl túninde tótenshe jaǵdaılar bolǵan joq.
Astana qalasynyń ákimi Áset Isekeshev 1 qańtar kúni ákim orynbasarlaryn, aýdan ákimderin jáne ІІD, TJD, qalalyq kommýnaldyq qyzmetterdiń basshylaryn jınap, jedel jınalys ótkizdi.
«Keńeste ótken táýlikte qalamyzdyń tynys-tirshiligin qamtamasyz etý jónindegi atqarylǵan jumystar, tirshilikti qamtamasyz etý obektileriniń úzdiksiz jumys isteýi, krımınogendik jaǵdaı boıynsha qabyldanǵan sharalar, qalada quqyqtyq tártipti qamtamasyz etý, qoǵamdyq kólikterdiń turaqty jumysy jáne ótken barlyq is-sharalar boıynsha esepter tyńdaldy, - dep jazdy ákimdiktiń baspasóz qyzmetiniń jetekshisi Elvıra Júrgenbaeva áleýmettik jelide.
Tıisti qurylymdyq bólimshelerdiń basshylarynyń aıtýynsha, ótken táýlikte elordada jaǵdaı turaqty bolǵan.
Sondaı-aq, qala ákimi qoǵamdyq tártipti qamtamasyz etý, joldar tazalyǵyn saqtaý jáne barlyq qalalyq kommýnaldyq qyzmetterge birqatar mindetter qoıdy.
Eske sala ketsek, ótken táýlikte elordada qala tirshiligi men qaýipsizdigin qamtamasyz etýge shamamen 32 myń adam jumyldyryldy.
