Jańa jyl túninde Astananyń muz qalashyqtarynda qandaı sharalar ótedi
ASTANA. QazAqparat - Jańa jyl túninde Astanada qazaqstandyq estrada juldyzdarynyń qatysýymen kontsertter uıymdastyrylady. Sondaı-aq túnde qalanyń úsh aýdanynda merekelik otshashý bolady. Mereke kúni bolatyn sharalar týraly málimetti Astana qalasynyń mádenıet jáne sport basqarmasy habarlady.
Basqarma taratqan málimetterge qaraǵanda, 31 jeltoqsanda «Han Shatyr» SOSO jáne elorda ákimdiginiń aldyndaǵy qalalyq alańda ornalasqan muz qalashyqtarynda halyqtyq serýender ótedi.
Jınalǵan qaýym saǵat 21:00-den tańǵy 03:00-ge deıin túrli oıyn-saýyqtarǵa qatysyp, kontsertter tamashalaıdy. Álı Oqapov, Dos, aǵaıyndy Júgúnisovter, Rınat Maltsagov, Ziruza, The Limba, «Dıart» toby, «Kılımandjaro» jáne basqalary óz ónerlerin ortaǵa salady.
2019 jyldyń qurmetine túnde «Han shatyr» SOSO aýmaǵynda, Esil ózeniniń jaǵasynda jáne Pýshkın kóshesi men Abylaı han dańǵylynyń qıylysynda merekelik otshashý bolady.
Budan basqa, elorda turǵyndary men qonaqtary syrǵanaqtar men muz qalashyqtarynda, muz aıdyndarynda demalystaryn qyzyqty ótkize alady. Bıyl «Han Shatyr» SOSO men ákimdik aldyndaǵy qalalyq alańda, Botanıkalyq baq aýmaǵynda «Astana Winter Land» qysqy oıyn-saýyq festıvali uıymdastyrylady. Demalys jáne mereke kúnderi munda qarda oınap, súıikti mýltfılmderdiń keıipkerlerimen sýretke túsýge bolady. Al anımatorlar qonaqtarǵa kóterińki kóńil-kúı syılaıdy. Munda bári ertegidegideı: qar búrshikteri, orman janýarlary, toqashtan jasalǵan úıler, orman túrindegi jáne Aıaz ata men Aqshaqardyń muz ınstallıatsııalary jasalǵan.
«Astana Winter Land» festıvaliniń qonaqtaryn kóńildi anımatorlar qushaq jaıa qarsy alady. Olar «Kólikter», «Kúshikter patrýli» atyshýly mýltfılmderiniń keıipkerlerimen, ergejeılilermen, aqqalamen jáne troldermen kezdesedi.
Budan basqa, boıshań qýyrshaqtarmen estelikke ádemi sýretke túsýge bolady. Atap aıtqanda, dońyz Peppa men Djordj, úrlengen aıýlar, Tissiz aıdahar, Grýt, Halk, dınozavr, Temir adam, úlken ponı, bars, saıqymazaq, Bagz Bannı qoıany, LOL qýyrshaǵy, Lego Nındzıago, Legomen, Maýı, Lýntık. Jınalǵan qaýym aqqalamen, pıngvınmen jáne kishkentaı aıý Ýmkamen oınaıdy, fıksık Nolıkty, Shrek pen Fıonany, ala tyshqandardy, Alladınniń sıqyrly shamynyń Perisin jáne Donald Dakty kóre alady.
Osyndaı ǵajaıyp merekede pıngvınder men «Salqyn júrek» mýltfılminen Olaftar fleshmobyn tamashalaýǵa bolady. Santa Klaýstyń kostıýmin kıgen barabanshylar da kópshilikke kóterińki kóńil-kúı syılaıdy. Festıvaldi uıymdastyrýshylar belsendi demalysty unatatyndarǵa alyp hokkeı oıynyn, úrlengen attarǵa minýdi, tıinniń dóńgeleginde júgirýdi, basqa da kóptegen qyzyqty usynady.
Halyqtyń súıikti mýltfılmderiniń keıipkerleri, qyzyqty oıyndar men fleshmobtar ár demalys jáne mereke kúnderi saǵat 13.00-den keshki 20.00-ge deıin óz kórermenderi men qatysýshylaryn kútedi. «Astana Winter Land» festıvali úsh muz qalashyǵynda 2019 jyldyń aqpan aıynyń sońyna deıin ótedi.
Elordalyq mádenıet mekemelerinde Jańa jyl merekesine oraı uıymdastyrylatyn sharalar jospary tirkelgen.
