Jańa jyl túni uıaly baılanys operatorynda jańa rekord tirkeldi
ALMATY. Qańtardyń 6-sy. QazAqparat /Erlik Erjanuly/ - Beeline abonentteri jeltoqsannyń 31-inen qańtardyń 1-ine qaraǵan túni 44 mıllıonǵa jýyq telefon qońyraýyn jasap, 14,5 mıllıon SMS-habarlamasyn joldady,
dep habarlaıdy QazAqparat «KarTel» JShS -niń baspasóz qyzmetine silteme jasap.
«Kar-Tel» JShS-niń tehnıkalyq dırektory Tuńǵyshbek Battalhanovtyń aıtýynsha, jalpy Beeline abonentteri jibergen SMS-habarlamalar men jasalǵan qońyraýlar sanynyń eń úlken bóligi Jańa jyldyń alǵashqy saǵatynda tirkelgen. Qańtardyń 1-i kúni túngi 00:00 men 01:00 aralyǵynda 1 mıllıon 900 myńǵa jýyq SMS-habarlama joldanyp, 4 mıllıonnan astam qońyraý jasaldy. Aldyn ala jasalǵan daıyndyq jumysynyń nátıjesinde baılanys operatory bul júktemeni tolyq qamtamasyz etken. Onyń sózine qaraǵanda, Jańa jyl túni jasalatyn qońyraýlar sany jyl saıyn artyp keledi. Osy úrdis bıyl da óz jalǵasyn taýyp, jańa rekordtyq kórsetkish tirkeldi. Mysaly, ótken jylmen salystyrǵanda qońyraýlar sany bıyl 40 paıyzǵa joǵarylap otyr.
