Jańa jyl túni elordalyq polıtseıler kúsheıtilgen rejımde jumys istedi
NUR-SULTAN. QazAqparat – Jańa jyldy merekeleý kezinde Nur-Sultan qalasy polıtsııa departamentiniń qyzmetkerleri turǵyndardyń tynyshtyǵy men qaýipsizdigin saqtaý úshin kúsheıtilgen rejımde jumys istedi, dep habarlaıdy QazAqparat.
Elordalyq polıtsııa basshysy Erjan Sádenovtiń aıtýynsha, jalpy jańa jyl túni tynysh ótti. Aýyr jáne asa aýyr qylmystarǵa jol berilgen joq.
«Ótken táýlikte elorda aýmaǵynda 9 qylmys tirkeldi, onyń altaýy «izin sýytpaı« ashyldy. Polıtsııanyń «102» shuǵyl shaqyrý pýltine azamattardan 2 myńǵa jýyq qońyraý kelip tústi. Bul negizinen jol qozǵalysy erejelerin buzý, túngi tynyshtyqty buzý jáne otbasylyq janjaldar», - dedi E. Sádenov.
Sonymen birge, elorda joldarynda 73 jol-kólik oqıǵasy tirkeldi, jaraqat alǵandar men qaza tapqandar joq. Kólikti mas kúıinde basqarǵany úshin bir júrgizýshi ustaldy, oǵan qatysty QR ÁQBtK-niń 608-babynyń 1-bóligi boıynsha ákimshilik is qozǵaldy.
«Qurmetti elorda turǵyndary men qonaqtary, barshańyzdy Jańa jylmen quttyqtaımyn, densaýlyq, baqyt jáne amandyq tileımin! Zańsyz áreketter jasamańyz, jol erejelerin saqtańyz, joldarda abaı bolyńyz. Balalardy órt sóndirgishterdi ózdiginen bastaýǵa jol bermeńiz. Ózińizdi jáne jaqyndaryńyzdy qorǵańyz!»,- dedi elordalyq polıtsııa basshysy.
