Jańa jyl merekesinde úıge qansha adamdy qonaqqa shaqyrýǵa bolady
ALMATY. QazAqparat – Almatynyń bas sanıtarlyq dárigeri Jandarbek Bekshın onlaın brıfıng barysynda Jańa jyl meıramynda úıge qansha qonaq shaqyrýǵa bolatynyn aıtty, dep habarlaıdy QazAqparat tilshisi.
Onyń aıtýynsha, adam sany 10-nan assa, ol adamdardyń jappaı jınalǵanyn bildiredi.
«Jańa jyl – otbasylyq mereke. Onda bir otbasy bolyp turatyndardyń bári jınala alady: ata-ájesi, ata-anasy men balalary. Otbasy músheleri 15 adam bolsa da bolady. ıAǵnı, Jańa jyldy birge toılaı alady», - dedi ol.
Sonymen qatar, ol koronavırýs boıynsha jaǵdaıdyń ýshyǵyp jatqanyn eskere otyryp, karantın talaptaryn muqııat saqtaýǵa shaqyrdy.
«Jasyratyny joq, jaǵdaı kúrdeli. Búginde biz «sary» aımaqta turmyz. Barlyq saqtyq sharasyn qoǵamdyq jerlerde ǵana emes, otbasyńyzda da saqtaý kerek. Bizdiń barlyq talabymyz saqtalǵan jaǵdaıda ǵana ınfektsııaǵa qarsy tura alamyz», - dedi Jandarbek Bekshın.
