Jańa jyl merekesi kúnderi myńnan astam polıtsııa qyzmetkeri tártipti qamtamasyz etedi
ASTANA. QazAqparat - Jańa jyl merekesi kúnderi 31 jeltoqsannan 4 qańtarǵa deıin, sondaı-aq 7 qańtarda pravoslavıelik Rojdestvo merekesi kúni Astana qalasynyń ІІD jeke quramy kúsheıtilgen tártipte qyzmet etedi, dep habarlady astana.gov.kz.
Іshki ister departamenti baspasóz qyzmetiniń habarlaýynsha, merekelik is-sharalardy ótkizý baǵdarlamasyn eskere kele, qoǵamdyq tártipti qorǵaýǵa myńnan astam polıtsııa qyzmetkeri, 200-den artyq qyzmettik kólik tartylady. Oqıǵa oryndaryna ýaqytyly barý úshin qosymsha jedel tergeý toptary quryldy. Kósheler men qoǵamdyq oryndarda, ásirese, keshki jáne túngi ýaqytta kóńil kóteretin oryndarda patrýldik jáne áskerı narıadtar tyǵyzdyǵy ulǵaıtylmaq. Qalada qondyrǵylar men syrtqy bezendirýdi saqtaý maqsatynda sahnalardy, mádenıet jáne sport nysandaryn qorǵaý qamtamasyz etiledi. «Rýbej» júıesiniń statsıonarlyq beketterinde shyrshalardy, sertıfıkattalmaǵan pırotehnıkalyq ónimderdi jáne basqa da tyıym salynǵan zattardy zańsyz ákelýdi baqylaý kúsheıtildi. Orman qorǵaý organdarymen birlesip qylqan japyraqty aǵashtardy zańsyz shabý jáne satý faktilerin boldyrmaý boıynsha is-sharalar júrgizilýde. Sertıfıkattalmaǵan pırotehnıkalyq ónimniń zańsyz aınalymynyń jolyn kesýge baǵyttalǵan «Pırotehnıka -2014» jedel aldyn alý is-sharasy ótkizilýde. Merekelik otshashýlar ótetin oryndarda qaýipti aımaqtar qorshaýǵa alynady.
