Jańa jyl merekesi qarsańynda Almaty polıtseıleri mektep oqýshylaryna nusqaý berdi
ALMATY. QazAqparat - Jańa jyl meresi qarsańynda Almaty polıtseıleri mektep oqýshylaryna nusqaý berdi, dep habarlaıdy QazAqparat Almaty qalalyq PD baspasóz qyzmetine silteme jasap.
Baspasóz málimetterine qaraǵanda, eń aldymen, kámelettik jasqa tolmaǵandarmen jumys ınspektorlary oqýshylarǵa qoǵamdyq qaýipsizdiktiń sharalary men qoǵamdyq oryndardaǵy tártip erejeleri týraly eskertti. Budan ózge olar balalarǵa, otshashýdy jáne basqa tutanǵysh zattardy paıdalaný erejelerin buzý saldarynan týyndaýy múmkin zardaptar týraly eskertti.
«Qalada kámeletke tolmaǵandardy zańgerlik jaǵynan barynsha oqytý áli de jalǵasýda. Mektep oqýshylarymen qylmystyń aldyn alý máselesi boıynsha áńgimelesemiz, orta mektepterde oqýshylar arasynda zańǵa baǵynyshty minez-qulyqty qalyptastyrý arqyly zańnyń ústemdigin saqtaý men nyǵaıtýǵa baǵyttalǵan quqyqtyq, uıymdastyrýshylyq sharalar kesheni týraly sóılesemiz. Budan basqa, dıalogtar azamattyń, qoǵamnyń jáne memlekettiń qundylyqtary týraly áńgimelerge negizdelgen.
Almaly aýdanynyń ıývenaldy polıtsııa qyzmetkerleriniń kezekti sapary B.Atyhanuly atyndaǵy №36 gımnazııada ótti. Dáris barysynda oqýshylar qoǵamda durys áreket etýdi, qaýipti jaǵdaıda ne isteýge bolatyndyǵyn jáne kez kelgen quqyqbuzýshylyqtyń jaýapkershilikke ákeletinin bildi. Biz oqýshylardy bóten adamdarmen kezdesý kezinde óte muqııat bolýǵa shaqyrdyq jáne olar kómekke júgine alatyn «102» nómiri jaıynda eske saldyq», - dep habarlady, Almaty qalalyq PD JPQ ıývenaldy polıtsııa bóliminiń bastyǵy, polıtsııa polkovnıgi Leıla Álipbaeva.
