Jańa jyl keshinde órt qaýipsizdigin qamtamasyz etý úshin 1090 ınspektorlyq quram jasaqtalǵan - TJK
ASTANA. QazAqparat - Jańa 2016 jyldy qarsy alý keshinde órt qaýipsizdigin qamtamasyz etý úshin Tótenshe jaǵdaılar komıteti 1090 ınspektorlyq quramdy jasaqtaǵan.
Bul týraly búgin jańa jyldyq sharalardy ótkizgen kezde órtke qarsy qaýipsizdik qaǵıdalaryn jáne pırotehnıkalyq buıymdardy paıdalaný qaǵıdalaryn saqtaý taqyrybynda ótken brıfıng barysynda QR ІІM Tótenshe jaǵdaılar komıtetiniń resmı ókili Rýslan Imanqulov málim etti.
«Jańa jyl merekesi - adamdardyń is-sharalarǵa kóp baratyn kezeńi. Órt statıstıkasy da osy jańa jyl kezeńinde arta túsedi. Jańa jyldyq mereke ótetin ákimshilik nysandarǵa erekshe jaýapkershilik júkteledi. Uıym basshylary adamdar jappaı jınalatyn is-sharalardy uıymdastyrý kezinde birqatar sharttardy oryndaýy tıis. Ol sharttardyń barlyǵy da bizdiń saıtta bar. Memlekettik órtke qarsy qyzmet ınspektorlary adamdar kóp baratyn jańa jyldyq is-sharalar ótkizilýi múmkin jerlerde qyzmetkerler quramy úshin órt qaýipsizdik qaǵıdalary týraly nusqaýlar júrgizip keledi»,-deıdi R.Imanqulov.
Resmı ókil habarlaǵandaı, Qazaqstan boıynsha Jańa jyl keshinde órt qaýipsizdigin 1090 ınspektorlyq quram qadaǵalaıdy.
«Anyqtama úshin aıtyp óteıin, oblystardyń jáne Astana, Almaty qalalarynyń tótenshe jaǵdaılar departamenti Jańa 2016 jyldyq is-sharalardy ótkizý kezinde 1090 ınspektorlyq quramdy jumyldyrdy»,-dep atap ótti R.Imanqulov.
