Jańa jyl qarsańynda «Baqytty otbasy» baǵdarlamasynyń 120 qatysýshysy páter kiltterin aldy
Olar birneshe jyldan beri turǵyn úı kezeginde turǵan. Qoljetimdi sharshy metrlerge turǵyndar Otbasy bankiniń («Báıterek» holdınginiń enshiles uıymy) nesıelendirýi arqyly ıe bolyp otyr.
Baǵdarlama aıasynda qarjy qurylymy jyldyq 2 paıyzdyq mólsherlememen zaem berdi. Al alǵashqy jarna baspana qunynyń nebári 10 paıyzyna ǵana teń.
Shymkent turǵyndary taza árleýdegi páterlerdi 1 sharshy metrine 180 000 teńgeden satyp aldy.
Jańa jyl qarsańynda Shymkent qalasynyń ákiminiń orynbasary Maqsut Isahov pen Otbasy bank fılıalynyń dırektory Dáýren Saýdabaev «Baqytty otbasy» baǵdarlamasyna qatysýshylardy qonys toılarymen quttyqtady.
– Búginde kópbalaly otbasylar men múmkindigi shekteýli balalardy tárbıelep otyrǵan otbasylar páter kiltterin alyp otyr. Elimizde osy sanattaǵy azamattarǵa erekshe kóńil bólinedi. Ásirese, olardyń qoldaýy úshin «Baqytty otbasy» memlekettik baǵdarlamasy qolǵa alyndy. Ony júzege asyrýǵa bıyl el bıýdjetinen 51 mıllıard teńge bólindi. Bul Qazaqstan boıynsha 5 myńǵa jýyq otbasy qonys toıyn toılaıdy degen sóz. Olardyń arasynda shymkenttikter de bar. Úıleri árqashan jyly, jaıly bolyp, balalardyń shat-shadyman kúlkisine tolsyn, – deıdi «Otbasy bank» AQ Shymkent qalalyq fılıalynyń dırektory Dáýren Saýdabaev.
Eki bólmeli páterde qonys toıyn Gúlmıra Mahaeva da toılamaq. Ol eki balanyń anasy, búldirshinderiniń bireýine erekshe kútim qajet.
– Úıimizdiń ornalasqan jerine rızamyn, qala ortalyǵynda. Bul jerden mektepke de, aýrýhanaǵa da, jumysqa da ońaı jetemin. Páter birinshi qabatta ornalasqan, bul bizdiń otbasymyzǵa da yńǵaıly, sebebi bir ulymnyń múgedektigi bar. Nesıe boıynsha 83 myń teńge tóleımin. Bul Shymkentte páter jaldaýdan eki ese arzan, - dep qýanyshymen bólisti Gúlmıra Mahaeva.
Jalpy bıylǵy jyly Otbasy bank memlekettik baǵdarlamalar aıasynda kezekte turǵan 10 518 adamnyń turǵyn úı jaǵdaıyn jaqsartýǵa kómektesti. «Baqytty otbasy» baǵdarlamasy boıynsha 1247 qazaqstandyqtyń baspana máselesi sheshildi, «Shańyraq» baǵdarlamasy aıasynda 5989 adam qonys toıyn toılady, sondaı-aq «Nurly jer» baǵdarlamasy boıynsha 3282 otbasy óz úılerine kóshti.
