Jańa jyl qarsańynda 120 qordaılyq otbasy qonys toıyn toılady
TARAZ. QazAqparat – Jańa jyl qarsańynda Jambyl oblysy Qordaı aýylyndaǵy «Batys» turǵyn alabynda 60 páterli bes qabatty eki turǵyn úı paıdalanýǵa berildi. Nysan qurylysy «Jumyspen qamtýdyń jol kartasy» memlekettik baǵdarlamasy aıasynda júzege asqan, - dep habarlaıdy QazAqparat tilshisi.
Bul kúni kópbalaly jáne tolyq emes otbasylar, múgedek balalary bar otbasylar jańa páterlerdiń kiltterine ıe boldy. Talaı jyldar boıy páter kezeginde turyp, óz baspanalary bolýyn armandaǵan otbasylar bul Jańa jyl qarsańynda tamasha tartý bolǵany sózsiz. Endi olar jańa aýdanda ornalasqan jaıly úıde turatyn bolady. Turǵyn úı aýmaǵy tolyǵymen abattandyrylyp, sýmen, elektr jáne gazben qamtylǵan. Úılerdiń qabyrǵalary Abaı men ál-Farabı beıneleri beınelengen mýraldarmen bezendirilgen.
QR Indýstrııa jáne ınfraqurylymdyq damý mınıstri Beıbit Atamqulov pen Jambyl oblysynyń ákimi Berdibek Saparbaev Qordaı turǵyndarynyń qonys toı qýanyshymen bólisti.
«Elbasy men Memleket basshysynyń saıasaty halyqty áleýmettik qoldaýǵa baǵyttalǵan. Bizge ońaı bolmaǵan ótip bara jatqan jylda buǵan taǵy da kóz jetkizdik. Pandemııaǵa qaramastan, 2020 jyly búkil Qazaqstan aýmaǵynda úlken qurylystar júzege asty. El boıynsha 15 mıllıon sharshy metr turǵyn úıdi paıdalanýǵa berý josparlanýda. Úı kiltterin eń aldymen az qamtylǵan jáne kóp balaly otbasylar, jetim jáne halyqtyń áleýmettik osal toptaryndaǵy basqa da azamatar ıelenýde. Bul baǵytta Qordaı aýdanynda da kóptegen jumystar júrgizilip jatqanyn kórip otyrmyz. Barshańyzdy baspana qýanyshtaryńyzben jáne Jańa jylyńyzben quttyqtaımyn! Shańyraqtaryńyzda tek shattyq ornasyn», - dep izgi lebizin jetkizdi Beıbit Atamqulov.
Onyń quttyqtaýyna aımaq basshysy Berdibek Saparbaev ta qosyldy.
«Osy aýqymdy jumystardyń barlyǵynyń basty maqsaty – turǵyndardyń ómir súrý sapasyn jaqsartý, ál-aýqatyn arttyrý. Osy oraıda jańa jumys oryndary qurylyp, áleýmettik nysandar ashylýda. Qordaı óńirin damytýǵa barlyǵy 35 mıllıard teńge qarastyrylyp, 22 aýyl gazǵa qosylyp, 100-ge jýyq kóshe asfalttalyp, turǵyn úıler salynýda. Biz munymen toqtap qalmaımyz. Keler jyly Qordaı aýylynda taǵy birneshe turǵyn úı paıdalanýǵa beriledi», - dep oblys ákimi jergilikti turǵyndardy qýantty.
Beıbit Atamqulov pen Berdibek Saparbaev qonystoı ıelerimen birge jańa páterlerdi aralap shyqty. Kópbalaly ana Jazıra Rahym qonaqtarǵa óziniń úsh bólmeli páterin tanystyrdy.
«Biz segiz bala tárbıelep otyrǵan úlken otbasymyz. Jubaıym ýaqytsha jumyssyz. Men tórt aılyq balammen úıde otyrmyn. Áli jumys tappadym. Biz buǵan deıin turǵyn úı jaldap kelgen bolatynmyz. Endi mine óz páterimizge qol jetkizdik, endi páterden-páterge kóshpeıtinimizge ózim áli sene almaı turmyn», - deıdi kópbalaly ana.
Sáýle Jańabaeva da jalǵyzbasty ana retinde jańa páterge ıe bolǵan. Onyń balalary óz bólmelerin qalaı jabdyqtaıtynyń aldyn ala josparlap qoıypty.
«Páter jyly ári jaıly. Maǵan aýladaǵy balalar alańy unady. Kelesi kóshede aýrýhana, mektep, odan ári azyq-túlik bazary ornalasqan. Munda kúndelikti ómirge qajettiniń bári bar», - deıdi Sáýle Jańabaeva.
Osy sátte onyń kórshileri aýlany qalaı bezendiretinderin jáne qandaı gúlder otyrǵyzylatyndyǵyn qyzý talqylap jatty.
Aýdandyq qurylys bóliminiń bastyǵy Eldos Mendekeev Qordaı aýylynda kelesi jyly paıdalanýǵa beriletin taǵy eki kópqabatty turǵyn úı salynyp jatqanyn jetkizdi. Gvardeısk aýylynda bıologııalyq qaýipsizdik máseleleri ǵylymı-zertteý ınstıtýtynyń qyzmetkerlerine arnalǵan taǵy bir úı boı kóterýde.
