Jańa júıe arqyly memleket salymshylardyń bilimge jumsaıtyn qarjysynyń birshama bóligin óz moınyna alady - Bilim mınıstri
ASTANA. 13 jeltoqsan. QazAqparat - Memlekettik bilim berý jınaqtaý júıesi arqyly memleket salymshylardyń bilimge jumsaıtyn qarjysynyń birshama bóligin óz moınyna alady. Búgin QR Parlamenti Senatynyń jalpy otyrysynda «Memlekettik bilim berý jınaqtaý júıesi týraly» zańy boıynsha baıandaǵan Bilim jáne ǵylym mınıstri Baqytjan Jumaǵulov osylaı málim etti.
Mınıstrdiń aıtýynsha, atalǵan zań boıynsha bilim berýdiń jınaqtaý júıesi arqyly salymshynyń memleket syıaqysyn saqtaı otyryp, bilim berý jınaqtaý salymynyń qarajatyn alý quqyǵy qarastyrylǵan. Sonymen qatar, jınaqtalǵan qarajatty maqsatty paıdalaný shartymen ony úshinshi tulǵalarǵa berý quqyǵy da kózdelgen.
«Tanysý úshin jobada belgilengen normalar boıynsha bir mysal keltireıin. Mysaly, ata-ana 10 jastaǵy balasy úshin depozıt ashyp, jınaqtaý boıynsha 7 jyldy tańdaıdy. Alǵashqy jarna 5000 teńgeni qurasa, keıingi jarnalar aı saıyn 15000 teńge. Bul rette banktiń syıaqysy - 8, al memlekettiki 5 paıyzdy quraıdy. Jınaqtaý merziminiń sońyna deıin, bala 17 jasqa tolǵanda onyń somasy 2 mln. 75 myń teńge bolady. Sonda salymshynyń qarajaty - 60 paıyz, bank syıaqysy - 23 paıyz, memlekettiń syıaqysy - 17 paıyzdy quraıdy», - deıdi mınıstr. Onyń aıtýynsha, salymshynyń basym sanattary, onyń ishinde jetim balalar men kóp balaly otbasylar úshin memleket tarapynan syıaqy odan da kóp bolýy múmkin. «Osylaısha, salymshylardyń bilimge jumsaıtyn qarjysynyń birshama bóligin memleket óz moınyna alyp otyr. Bul shamamen alǵanda 15-20 paıyz», - deıdi B. Jumaǵulov.
