Jańa jumys oryndary jáne jalaqynyń ósýi – memlekettiń jeńil ónerkásipti qoldaýynyń mindetti sharty
ASTANA.KAZINFORM - Premer-mınıstrdiń orynbasary – Ulttyq ekonomıka mınıstri Serik Jumanǵarınniń tóraǵalyǵymen ótkizilgen keńeste Jeńil ónerkásipti damytýdyń 2026-2030 jyldarǵa arnalǵan keshendi josparynyń jobasyna engizilgen kásiporyndardy jergiliktendirýdi arttyrý týraly kelisimderdiń tetigi men qarsy mindettemeleri qaraldy. Bul týraly Úkimettiń baspasóz qyzmeti habarlady.
7 bólim men 30 is-sharadan turatyn Keshendi jospar jobasy jeńil ónerkásip kásiporynyn qoldaýdyń orta jáne uzaq merzimdi sharalaryn qamtıdy.
Negizgi orta merzimdi shara qataryna kásiporyndy shıkizatpen qamtamasyz etý, ótkizý naryǵyn keńeıtý, memlekettik satyp alý tetigin jetildirý jáne otandyq óndirýshilerge teń básekelestik jaǵdaı jasaý jatady.
Satyp alý rásimin jeńil ónerkásip kásiporynynyń óndiristik tsıkli ereksheligine beıimdeýge erekshe nazar aýdarylady. Atap aıtqanda, memlekettik satyp alýdaǵy ónimdi jetkizý merzimin ulǵaıtýdyń múmkindigi pysyqtalyp jatyr.
Uzaq merzimdi sharalar sheńberinde shıkizat pen daıyn ónimdi tolyq qadaǵalaý júıesin, sondaı-aq óndiristi jergiliktendirýdi arttyrý kelisimi tetigin engizý máselesi qaraldy.
Usynylyp otyrǵan tetik memleket pen saladaǵy kásiporyndar arasynda kelisim jasaýdy qarastyryp, bul rette kompanııalar qarsy mindettemelerdi ózi qabyldaǵan kezde qosymsha qoldaý sharasyn ala alady.
Atap aıtqanda, kelisimde óndiris kólemin ulǵaıtý, jergiliktendirý deńgeıin arttyrý, qyzmetkerlerdiń jalaqysyn arttyrý, personaldyń biliktiligin arttyrý, jańa jumys oryndaryn qurý jáne múgedek adamdardy jumysqa ornalastyrý mindettemelerin bekitý josparlanyp otyr.
Osyndaı kelisim jasasqan kásiporyndar úshin arnaıy ınvestıtsııalyq kelisimshartty, jeńildikpen qarjylandyrýdy jáne ózge de yntalandyrý tetigi sekildi memlekettik qoldaý sharalaryn alý múmkindigi kózdeledi.
Talqylaýdy qorytyndylaı kele, Serik Jumanǵarın múddeli memlekettik organdarǵa, salalyq qaýymdastyqtar men bıznes ókilderine maýsymnyń sońyna deıin usynylǵan tetikterdi pysyqtap, kelisilgen usynystar berip, olardy Jeńil ónerkásipti damytýdyń keshendi jospary sheńberinde odan ári iske asyrýdy tapsyrdy.
Aıta keteıik, bıylǵy bes aıdyń qorytyndysy boıynsha el ekonomıkasynyń ósimi 3,7% bolǵan. Bul týraly Premer-mınıstr Oljas Bektenovtiń Memleket basshysynyń ártaraptandyrýǵa basa nazar aýdara otyryp, ekonomıkanyń turaqty ósýin qamtamasyz etý týraly tapsyrmalaryn oryndaý máselesi boıynsha ótkizgen keńesi barysynda málim boldy.
