Jańa «Juldyzdy soǵystar» fılmi kassalyq rekord jaǵynan «Avatar» fılminen asyp ketýi múmkin
ASTANA. QazAqparat - «Juldyzdy soǵys: Kúshtiń oıanýy» ańyz jelisindegi fantastıkalyq kınonyń jalǵasy rojdestvoda 49,3 mln dollar jınap, Qurama Shtattarda kassalyq jıyn rekordyn jańartty.
Bul kınematograf tarıhyndaǵy merekelik kúndegi eń joǵarǵy kórsetkish. Burynǵy «rojdestvolyq» rekord kishi Robert Daýnıdiń qatysýymen Gaı Rıchıdiń «Sherlok Holms» fılmine tıesili bolǵan. 2009 jylǵy 25 jeltoqsanda bul kartına 24,6 mln dollar jınady. «Juldyzdy soǵystar» jetinshi bólimi kassalyq jıynnyń jalpy somasy boıynsha da senimdi kósh bastaýdy jalǵastyrýda. Bir apta buryn birqatar elderde premerasy ótken fılm álem boıynsha 900 mln dollar jınaǵan, osy demalys kúnderi 1 mlrd dollar mejesin eńsermek. Búgingi tańda eń nátıjeli kommertsııalyq fılmge Djeıms Kemeronnyń «Avatar» (premerasy ótken 2009 jyldan bastap ol 2,79 mlrd dollar jınaǵan) jáne «Tıtanık» (1997 jyldan bastap, ol 2,19 mlrd dollar jınaǵan) jatady. Kıno salasynyń sarapshylary «Juldyzdy soǵystar» fılminiń bir aptadaǵy qarqynyna qarap, onyń Kemeronnyń fılminen asyp túsetinine kúmán keltirmeıdi.
