Jańa juqpaly aýrýlardyń edáýir bóligi janýarlardan taraıdy – dáriger
ALMATY. KAZINFORM – Almaty qalasynyń sanıtarlyq dárigerleri zoonozdy ınfektsııalardyń aldyn alý joldaryn túsindirdi.
Almaty qalasy sanıtarııalyq-epıdemıologııalyq baqylaý departamenti basshysynyń orynbasary Ásel Qalyqovanyń aıtýynsha, zoonozdyq ınfektsııalar janýarlardan adamǵa tabıǵı jolmen juǵady. Jańa juqpaly aýrýlardyń edáýir bóligi janýarlardan taraıdy jáne búkil álem boıynsha halyq densaýlyǵyna eleýli qaýip tóndiredi.
– Eń keń taralǵan zoonozdarǵa qutyrma, saryp, leptospıroz, salmonellez, sondaı-aq ornıtoz, toksoplazmoz jáne basqa da ınfektsııalar jatady. Bul aýrýlar aýyr túrde ótip, kúrdeli asqynýlarǵa, keı jaǵdaıda ólimge ákelýi múmkin. Infektsııanyń negizgi kózderi: úı janýarlary (mysyqtar, ıtter), aýyl sharýashylyǵy janýarlary (iri qara mal, shoshqalar, qustar), jabaıy janýarlar, kemirgishter, – dedi Ásel Qalyqova.
Sanıtarııalyq dáriger ınfektsııanyń adamǵa berilýiniń negizgi joldaryn atady:
- Infektsııa janýarlarmen baılanys kezinde nemese olardyń silekeı, qan, zári arqyly juǵady.
- alımentarlyq jol: ınfektsııasy bar taǵamdy (et, sút, jumyrtqa) qoldanǵanda beriledi.
- aerogendik jol: ınfektsııa quramynda qozdyrǵyshtary bar shań nemese aerozol arqyly aýa arqyly taralady.
- transmıssıvtik jol: ınfektsııa tasymaldaýshylar (keneler, masalar, búrgeler) arqyly beriledi.
– Janýarlarmen tyǵyz baılanys, veterınarlyq baqylaýdyń bolmaýy, sanıtarlyq-gıgıenalyq talaptardy saqtamaý, sapasyz taǵam ónimderin paıdalaný – ınfektsııa juqtyrý qaýpine ákeledi. Zoonozdyq ınfektsııalardyń aldyn alý úshin jeke bas gıgıenasyn saqtaý mańyzdy. Sondaı-aq janýarlardy kútý nemese shıkizatpen jumys isteý kezinde jeke qorǵanys quraldaryn paıdalaný qajet. Odan bólek úı jáne aýyl sharýashylyǵy janýarlaryn turaqty veterınarııalyq tekserýden ótkizý, janýarlardy vaktsınatsııalaý, kemirgishter men jándikterge qarsy óńdeý júrgizý kerek, – dedi ol.
Eske salaıyq, Almatyda Infektsııalyq aýrýlardyń ulttyq ǵylymı ortalyǵy ashyldy.
