Jańa Joldaý jobalaryn júzege asyrýǵa 7,2 trln. teńgeden astam qarjy jumsalady

ASTANA. QazAqparat - «Qazaqstan jańa jahandyq naqty ahýalda: ósim, reformalar, damý» atty Joldaý jobalalaryn júzege asyrýǵa 7,2 trln. teńgeden astam qarjy jumsalady. Bul týraly búgin atalǵan Qazaqstan halqyna kezekti Joldaýyn jarııa etken Elbasy Nursultan Nazarbaev aıtty.

«Tolyqtaı alǵanda, Joldaýda usynylǵan barlyq sharalar shynaıy sıpatqa ıe jáne ár ýaqyttaǵydaı senimdi qarjylandyrylýmen qamtamasyz etilgen. 2014-2015 jyldary shaǵyn jáne orta bıznesti damytýǵa qazirdiń ózinde 1 trln. teńge bólindi», - dedi Elbasy.

Sonymen qatar QR Prezıdenti «Nurly jol» baǵdarlamasy jobalaryna 2,7 trln. teńge bólingenin aıtty. Munan bólek, taǵy da 2,7 trln. teńgeni elimizde halyqaralyq qarjy uıymdary berip otyr. Qytaı eli de 2,7 mlrd. dollar kóleminde nesıe usyndy.

«Tolyqtaı alǵanda, osy Joldaý jobalaryn júzege asyrýǵa 7,2 trln. teńgeden astam qarjy tartylady. Bul qarjylardyń tıimdi paıdalanylýy Úkimettiń basty mindeti jáne jaýapkershiligi», - dedi N.Nazarbaev.