Jańa joldardyń sapasyn jaqsartý maqsatynda Kólik jáne kommýnıkatsııa mınıstrligi tarapynan baqylaýdy kúsheıtý kerek - J. Káribjanov
ASTANA. 20 jeltoqsan. QazAqparat /Qanat Mámetqazyuly/ - Jańadan salynyp jatqan joldardyń sapasyn jaqsartý, bar joldardy talapqa saı tıimdi paıdalaný maqsatynda Kólik jáne kommýnıkatsııa mınıstrligi tarapynan baqylaýdy kúsheıtý kerek.
Búgin QR Parlamenti Májilisinde kólik ınfraqurylymyn damytý taqyrybynda ótken Úkimet saǵatyn qorytyndylaǵan Májilis Tóraǵasynyń orynbasary Jánibek Káribjanov osylaı málim etti.
Kólik jáne kommýnıkatsııa mınıstriniń baıandamasynan soń sóz alǵan Parlament Májilisi Tóraǵasynyń orynbasary Jánibek Káribjanov elimizdiń áleýmettik-ekonomıkalyq qarqyndy damýyna kólik salasynyń tıgizer áseriniń zor ekenine toqtalyp, bul rette salany ekonomıkanyń kúretamyry dep baǵalaı kele, ondaǵy sheshimin taba almaı otyrǵan máselelerdi de atap ótti.
«Birinshi másele, jergilikti jerlerdegi jol jóndeý jáne paıdalaný sharýashylyqtarynyń jol-qurylys tehnıkalyq jabdyqtarynyń tozýy jáne osy joldardyń sapasynyń tómendigine baılanysty. Sondyqtan, jańadan salynyp jatqan joldardyń sapasyn jaqsartý, bar joldardy talapqa saı tıimdi paıdalaný maqsatynda mınıstrlik tarapynan baqylaýdy kúsheıtý kerek. Ekinshi, temirjol salasynda kórsetiletin qyzmettiń sapasyn arttyrý, bıletterdi satýda jarııalylyq pen ashyqtyq mehanızmderin engizý qajet. Bul búgin sheshimin tabýy tıis tetik. Úshinshi, avıabıletter baǵasynyń tarıfteri mınıstrlik tarapynan qatty qadaǵalanýy oryndy dep esepteımiz»,- dedi J. Káribjanov.
Bul rette vıtse-spıker mınıstrlik tarapynan qabyldanǵan táýir josparlar men baǵdarlamalardyń bar ekendigine toqtalyp, «solardy sózden iske tezirek aýystyrý qajettigin» atap ótti.
