Jańa Jol qozǵalysy erejeleri: júrgizýshiler neni bilýi kerek

Ortasha jyldamdyq endi resmı túrde baqylanady

Eń basty ózgeristerdiń biri – eki baqylaý núktesiniń aralyǵyndaǵy ortasha jyldamdyqty qadaǵalaý júıesi Jol qozǵalysy erejelerinde resmı túrde bekitildi. Ádette, júrgizýshiler kamera bar tusqa kelgende ǵana jyldamdyǵyn ruqsat etilgen shamaǵa deıin túsiredi de, ol jerden ótip ketken soń, qaıtadan shekten tys kóteredi. Endi ondaı qýlyq jasaýǵa múmkindik bolmaıdy. Óıtkeni, saparǵa shyǵyp, qalaaralyq tas jolmen júre bastaǵanda, baqylaý kamerasy kólikti tirkeıdi. Sapardy aıaqtaǵannan keıin, tas joldyń sońyndaǵy kamera mashınany taǵy da esepke alady. Sonda tıisti araqashyqtyqty qansha ýaqytta júrip ótkeni jáne ortasha jyldamdyǵy avtomatty túrde belgili bolady. Sol arqyly júrgizýshi kamera bar tusta ǵana jyldamdyǵyn azaıtyp, basqa jerde ruqsat etilgen normadan asyryp, jaýapkershilikten qasha almaıdy.

Ortasha jyldamdyq uǵymy Qazaqstannyń zańnamasynda 2023 jyly paıda boldy. Degenmen, engizilgen túzetýler Jol qozǵalysy erejelerinde onyń qoldanylý tártibin bekitti jáne mundaı baqylaý júrgiziletin tas joldar tizbesin keńeıtti.

Búginde atalǵan júıe aqyly joldardyń segiz ýchaskesinde jumys istep tur:

Astana — Şýchınsk (140 km/saǵ);

Astana — Pavlodar (140 km/saǵ);

Shymkent — Qyzylorda (110 km/saǵ);

Shymkent — Taraz (110 km/saǵ);

Pavlodar — Semeı — Qalbataý (100–110 km/saǵ);

Oral — Reseı shekarasy (Saratov) (100 km/saǵ);

Pavlodar — Reseı shekarasy (Omby) (100 km/saǵ);

Jibek Joly — Temirtaý (140 km/saǵ).

Sonymen qatar, «QazAvtoJol» 10 shildeden bastap taǵy birneshe aqyly ýchaskede ortasha jyldamdyqty baqylaý júıesin engizip jatyr:

— Aqtóbe – Qandyaǵash;

— Almaty – Qorǵas;

— Kókshetaý – Petropavl;

— Astana – Temirtaý, Arshaly – Oshaǵandy ýchaskesinde.

Inspektorlar kólikti ne úshin toqtatqanyn túsindirýge mindetteldi

11 mamyrdan bastap polıtsııa qyzmetkerleriniń kólik quraldaryn toqtatý tártibi de ózgerdi.

Endi avtokólikti toqtatqan soń, laýazymdy tulǵa birden júrgizýshige baryp, toqtatqan sebebin aıtýy tıis. Eger azamat talap etse, tártip saqshysy oǵan qyzmettik kýáligin qolyna bermeı, kórsetýge mindetti.

Al Jol qozǵalysy erejelerin buzý faktisi foto nemese vıdeo quraldary arqyly avtomatty túrde tirkelse, onda polıtseı júrgizýshige atalǵan materıaldardy kórsetip, tanystyrýy kerek.

Kameralar eskertý belgilerinsiz jumys isteıdi

Taǵy bir ózgeris foto jáne vıdeo tirkeý keshenderine qatysty.

Endi kameralar ornatylǵany jóninde jol belgisin qoıý mindetti emes. Jol erejelerin buzý faktilerin tehnıkalyq quraldar ondaı eskertý bolsa da, bolmasa da, esepke alady.

Elektrli samokattarǵa arnalǵan jańa erejeler

1 shildeden bastap jalǵa alynatyn elektrli samokattardy qoldanýǵa qatysty jańa talaptar kúshine endi. Ondaǵy maqsat – jol qozǵalysynda qaýipsizdikti arttyrý.

Endi jalǵa beriletin ár elektrli samokattyń tirkeý nómiri bolýy tıis. Odan bólek, qoldanýshylar úshin azamattyq-quqyqtyq jaýapkershilikti saqtandyrý mindetti.

Eger azamattyń júrgizýshi kýáligi bolmasa, onda samokatty kólik júretin jolda qoldana almaıdy. Jalpy, avtokólik júretin jolda samokatty jasy 18-den asqan, kez-kelgen kategorııadaǵy júrgizýshi kýáligi bar, basyna qorǵanys dýlyǵasyn kıgen kisiler aıdaı alady. Qazir jaıaý júrginshiler jolynda elektrli samokatpen júrýge bolatyn eń joǵary jyldamdyq – 6 km/saǵ. Al 25 tamyzdan bastap, trotýarlar men jaıaý júrginshiler jolaǵynda samokatpen júrýge tolyqtaı tyıym salynady.

Qysqa merzimge jalǵa berýmen aınalysatyn kıksherıng kompanııalar úshin de jańa mindettemeler engizildi. Olardan mynadaı nárseler talap etiledi: samokattardyń tehnıkalyq jaǵdaıyn qamtamasyz etý, atalǵan quraldardyń jyldamdyǵy men ornyn baqylaý, arnaıy aımaqtarda jyldamdyǵyn avtomatty túrde shekteý, samokattardy beıbereket qoıyp ketýdiń aldyn alý, kólik quraldaryn tirkep, esebin júrgizý jáne qajet bolǵan jaǵdaıda derekterdi ishki ister organdaryna berý.

Jol-kólik oqıǵasynan keıin qaıtadan tehnıkalyq baıqaýdan ótkizý kerek

12 shildeden bastap taǵy bir norma kúshine enedi. Ol – jol-kólik oqıǵasyna ushyraǵan avtokólikter týraly ereje.

Eger jol-kólik oqıǵasy nátıjesinde mashınaǵa odan ári qoldanylýyna tyıym salynatyndaı deńgeıde zaqym kelse, onda mindetti túrde qaıtadan tehnıkalyq baıqaýdan ótkizilýi kerek. Mundaı tekseriske avtokólikti ishki ister organdarynyń quziretti laýazymdy tulǵasy baǵyttaıdy.

Aıta keteıik, buǵan deıin QazAvtoJol joldardaǵy jańa «aqyldy» kameralardyń ne úshin ornatylyp jatqanyn túsindirgen edi.