Jańa jol kartasy: Elde 100 qosymsha bilim nysany salynady

ASTANA. QazAqparat – Balalardyń shyǵarmashylyq jáne zııatkerlik áleýetin damytý úshin 100 jańa iri nysan salý boıynsha jol kartasy ázirlendi. Bul jaıynda Májilis depýtattarynyń saýalyna Premer-Mınıstrdiń orynbasary – Eńbek jáne halyqty áleýmettik qorǵaý mınıstri Tamara Dúısenovanyń jaýabynda aıtylǵan, dep habarlaıdy QazAqparat tilshisi.

«Memleket basshysynyń tapsyrmasyn iske asyrý úshin 50 balalar saýyqtyrý lagerin qurý, balalardyń shyǵarmashylyq jáne zııatkerlik áleýetin damytý úshin keminde 100 jańa iri obekt salý jónindegi jol kartasynyń jobasy ázirlendi. Qazirgi ýaqytta jol kartasynyń jobasy múddeli memlekettik jáne jergilikti organdarǵa kelisýge jiberildi. Jol kartasy jobasy aıasynda 2023-2027 jyldary 100 obekt, onyń ishinde 21 Innovatsııalyq shyǵarmashylyq ortalyǵy jáne 79 óner mektebin salý josparlanǵan. Bıyl jergilikti bıýdjet qarajaty esebinen 6 qosymsha bilim berý obektisiniń qurylysy bastaldy», - dep atap ótedi Tamara Dúısenova jaýabynda.

Sondaı-aq onyń atap ótýinshe, respýblıkalyq bıýdjet qarajaty esebinen Innovatsııalyq shyǵarmashylyqtyń 15 úlgilik ortalyǵyn jáne 79 úlgilik óner mektebin salý kózdelgen. Osy maqsattarǵa aldyn ala 178,6 mlrd teńgeden astam qarajat qajet bolady.

«Qazirgi ýaqytta 2024 jyly 15 qosymsha bilim berý obektisin salý úshin qajetti qujattar daıyndalýda. 100 jańa qosymsha bilim berý obektisiniń 52-si aýyldyq jerlerde salynatyn bolady. Bul 2027 jylǵa qaraı qosymsha 800 myńnan astam balany qamtýǵa múmkindik beredi. Jalpy, atalǵan obektilerdiń qurylysy Qazaqstan Respýblıkasynyń mektepke deıingi, orta, tehnıkalyq jáne kásiptik bilim berýdi damytýdyń 2023- 2029 jyldarǵa arnalǵan tujyrymdamasynda kórsetilgen», - dedi Úkimet basshysynyń orynbasary.