Jańa jol erejesi: «Sh» belgisin japsyrý mindetti emes
ASTANA. QazAqparat - Jańa jylda ereje de jańa bolady. Ózgertýlerge sáıkes, budan bylaı kólikke shegeli dóńgelek salynǵanyn bildiretin «Sh» belgisin japsyrý mindetti emes, dep jazady altaynews.
2017 jyldyń 11 qarashasynan bastap elimizde jańa jol júrý erejeleri kúshine engen bolatyn. Alaıda sol ýaqyttan beri quqyq qorǵaý organdary qyzmetkerleri jańa erejelerge úırene almaı jatqan júrgizýshilerdiń jibergen aǵattyqtaryna túsinistikpen qarap, olarǵa aıyppul salýdyń ornyna aýyzsha eskertý jasaýmen shektelip kelgen. Degenmen, jańa jyldan bastap bul jeńildikterdiń de ýaqyty aıaqtalmaq.
Oqyrman nazaryna 2018 jyldyń 1 qańtarynan bastap kúshine enetin sol ózgerister men jańa termınderdiń negizgilerin usynyp otyrmyz.
Eń aldymen, temir tulpardy toqtatqan jol saqshysy birden kólikke jaqyndap, júrgizýshiniń talaby boıynsha qyzmettik qujatyn kórsetýge mindetteledi. Ári qaraı kólikti toqtatýdyń sebebin túsindirýi tıis. Ereje buzylǵan jaǵdaıda ony rastaıtyn dálelder keltirýi qajet. Esterińizde bolsa, burynǵy nusqada polıtsııa qyzmetkeriniń toqtatylǵan avtokólikke birden jaqyndaýy kerek ekeni aıqyndalmaǵan bolatyn.
Aıtpaqshy, endi júrgizýshilerge jol ınspektorlarynyń is-áreketin beınekameraǵa túsirýine zań júzinde ruqsat etiledi.
Sondaı-aq dári iship nemese mas kúıde júrgenderge, aýrý haldegi adamdarǵa, ózimen birge kýáligi joqtarǵa (júrgizýshi kýáliginiń ornyna beriletin ýaqytsha kýálik, júrgizýshiniń ózi ekenin rastaıtyn qujat) jáne júrgizýshi kýáliginen aıyrylǵan azamattarǵa kólik tizginin berýge tyıym salynady.
Taǵy bir jańalyq, ózgelerge qaýipsiz ári jol qozǵalysyna kedergi keltirmeıtin jaǵdaıda kóliktiń artqa júrýine bolady. Alaıda, kóshe qıylysynda jáne aınalatyn jolda mundaı áreket jasaýǵa ruqsat etilmeıdi.
Velosıped joly nemese jolaǵy joq jerlerde moped (16 jastan joǵary) pen velosıped júrgizýshilerine (14 jastan joǵary) joldyń oń jaq bóliginiń shetimen qozǵalýǵa bolady, sondaı-aq olarǵa marshrýttyq kólik quraldaryna arnalǵan jolaqpen júrýge de ruqsat etilgenin aıta ketken oryndy.
Ózgertýlerge sáıkes, budan bylaı kólikke shegeli dóńgelek salynǵanyn bildiretin «Sh» belgisin japsyrý mindetti emes.
