Jańa jol aýylynyń turǵyndary qar basqan joldy qolmen arshyp jatyr - Aqmola oblysy
ASTANA. QazAqparat - Aqmola oblysy Býrabaı aýdany Jańajol aýyly «Astana-Kókshetaý» tas jolynyń boıynda ornalasqan eldi meken. Alaıda aýyldan kúre jolǵa deıingi 7 shaqyrym qashyqtyqty júrip ótý qystyń burqasyndy kúnderi qııamet-qaıymǵa aınalady. Bul týraly redaktsııamyzǵa habarlasqan aýyl turǵyny Serik Adalbekuly habarlaıdy.
Dál osy sátterde aýyl turǵyndary jıylyp, qar basqan joldy kúrekpen tazalap, shuǵyl jolǵa shyǵýǵa májbúr bolǵan kólikke jol ashyp berýde. Olardyń aq tútek boranda qar kúrep júrgenderine birneshe saǵattyń júzi bolǵan. Alaıda qalyń túsken qardy arshý áli de biraz ýaqyt qajet etetin sekildi.
«Ákimder, basqa da bılik ókilderi bul jaǵdaıdan habardar. Biraq 3 kúnnen beri joldy arshýǵa eshbir tehnıka kelgen joq. Amalsyz, 7 shaqyrym joldy qolmen arshýǵa kiristik», - deıdi Serik.
Aýyl turǵyndary osyǵan jaýapty organdardan shuǵyl arada joldy ashyp berýin surap otyr. Sebebi bul úlken jolǵa shyǵatyn jalǵyz jol bolǵandyqtan aýyl adamdary qar qursaýynda qamalyp otyr.
