Jańa jobalar men ónerkásiptik ósim: Qostanai Invest Forum - 2026 ótti
QOSTANAI. KAZINFORM – Qostanai Invest Forum - 2026 forýmy Qostanaıda ınvestorlardyń, bıznes ókilderi men memlekettik organdar qyzmetkerleriniń basyn qosty. Jıynda óńirdiń ınvestıtsııalyq áleýeti, ónerkásipti damytý jáne jańa jobalardy júzege asyrý sııaqty negizgi máseleler talqylandy.
Іskerlik forým bastalar aldynda Qazaqstan Prezıdenti Qasym-Jomart Toqaevtyń óńirdiń mereıtoıyna oraı joldaǵan quttyqtaý haty oqyldy.
Memleket basshysy Qostanaı oblysynyń el tarıhynda erekshe oryn alatynyn jáne bul óńir kórnekti aǵartýshylar men memleket qaıratkerleri dúnıege kelgen jer ekenin atap ótti. Búginde bul oblys - Qazaqstannyń iri ónerkásiptik jáne agrarly óńiriniń biri.
Qostanaı oblysynyń ákimi Qumar Aqsaqalov osy ınvestıtsııalyq forýmnyń oblystyń qurylǵanyna 90 jyl tolýyna oraı ótkizilýiniń erekshe mańyzy bar ekenin sóz etti.
— Búgin Qostanaı oblysynyń qurylǵanyna 90 jyl tolýyn atap ótip jatyrmyz. Degenmen, 90 jyl – bul tek resmı derekterdegi data ǵana. Óńirimizdiń tarıhy myńjyldyqtarǵa sozylady, al búgingi jetistikterimiz – sol kóp ǵasyrlyq tarıhtyń jalǵasy, – dedi oblys ákimi.
Qumar Aqsaqalov shıkizatty tereńdetip óńdeýge, «jasyl» energetıka men kólik ınfraqurylymyn damytýǵa, sondaı-aq ınjenerlik kadrlardy daıarlaýǵa erekshe nazar aýdarylyp otyrǵanyn atap ótti.
— Biz ondaǵan jyldarǵa jospar quryp, bolashaqty oılaıtyn ınvestorlarmen jumys isteýge daıynbyz. Eger aýqymdy ekonomıkalyq ósimge úles qosa alatyn óńirdi izdeseńiz, Qostanaı oblysyna qosh keldińizder!, – dedi óńir ákimi.
Forýmnyń iskerlik baǵdarlamasynda sóz sóılegender qatarynda «Allur» dırektorlar keńesiniń tóraǵasy Andreı Lavrentev, Freedom Holding Group kompanııasynyń negizin qalaýshy Tımýr Týrlov, «Eýrazııalyq Top» JShS-nyń Bas dırektory Kýdrát Shamıev jáne «Astana bas jospary» ǴZJI» JShS Bas dırektory Rýslan Jaqypov boldy.
Olar mashına jasaý salasyn damytý, ınvestıtsııalyq jobalar, temir kenin óńdeý zaýytynyń qurylysy jáne jańartylǵan bas josparǵa sáıkes Qostanaı qalasyn damytý máselelerin talqylady.
Andreı Lavrentevtiń sózine qaraǵanda, Qostanaı oblysynda qazirgi kezde zamanaýı ónerkásiptik klaster qurylyp jatyr.
— Búgin biz qazaqstandyq shıkizattan bastap qazaqstandyq óndiristegi avtokólikke deıingi tuıyq tsıkldi óndiristi qalyptastyryp jatyrmyz, - dep atap ótti ol.
Tımýr Týrlov Qostanaı oblysyn elimizdiń eń qarqyndy damyp kele jatqan óńirleriniń biri retinde sıpattady.
— Qostanaı oblysy joǵary ınvestıtsııalyq áleýetke ıe jáne óńirdiń odan ári damýyna múddelimiz», — dep atap ótti Týrlov.
Rasýl Rysmambetov oblystyń 90 jyldyǵy atqarylǵan jumystardy qorytyndylaýǵa jáne damýdyń aldaǵy basymdyqtaryn aıqyndaýǵa jaqsy múmkindik ekenin aıtty.
— Óńirdiń áleýeti orasan zor. Eger turǵyn úı, energetıka jáne ınfraqurylymǵa qatysty máseleler qatar sheshilse, munda birneshe jyl ishinde naǵyz ekonomıkalyq órleý bastalýy múmkin, — deıdi Rysmambetov.
Aıta keteıik, Memleket basshysy Qasym-Jomart Toqaev Qostanaı oblysynyń qurylǵanyna 90 jyl tolýyna arnalǵan saltanatty is-sharaǵa qatysýshylardy quttyqtady.
