Jańa jobada kóshi-qonnyń túrleri, formasy zań júzinde aıqyndalatyn bolady
ASTANA. Qazannyń 29-y. QazAqparat /Qanat Mámetqazyuly/ -«Halyqtyń kóshi-qony týraly» jańa zań jobasynda kóshi-qonnyń túrleri, formasy zań júzinde aıqyndalyp bekitiletin bolady.
Bul týraly búgin QR Parlamenti Májilisinde kóshi-qon salasyndaǵy zańnamalardyń halyqaralyq tájirıbesine arnalǵan semınar barysynda QR Eńbek jáne halyqty áleýmettik qorǵaý mınıstrliginiń Jaýapty hatshysy Tamara Dúısenova málim etti, dep habarlaıdy QazAqparat.
Jaýapty hatshynyń aıtýynsha, qazirgi kúni Qazaqstanda sheteldik jumys kúshine jalpy kvota belgilenip kelse, álemdik tájirıbede jalpy kvotamen qosa salalyq, eldik jáne basqa da kvota túrleri qoldanylady. Osyǵan oraı, Májiliske usynylatyn jańa zań jobasynda ımmıgranttardyń elge kelý maqsattary jiktelip, onyń birneshe túrleri naqty kórsetiletin bolady. Máselen, ol túrlerge bilim alý, eńbek etý, otbasyn qurý, tarıhı otanyna oralý, azamattyq alý maqsattaryn júzege asyrý jáne gýmanıtarlyq, saıası sebeptermen keletindigi aıqyndalady. Al joǵary bilikti mamandardy tartý jáne bekitýler, sondaı-aq oqý maqsatyndaǵy ımmıgratsııada orta mektepterde oqıtyndar, stýdentter men oqýshylar jáne tájirıbeden ótýshiler sekildi sanattar boıynsha jikteledi.
Sonymen birge, eńbek kóshi-qonyna qatysýshylardy sheteldik jumysshylar, maýsymdyq sheteldik jumysshylar jáne bıznes- ımmıgranttar dep bólý qarastyrylýda. Bul jerde sheteldik mamandar men maýsymdyq jumysshylar elimizge Úkimet bekitken kvotalarmen ǵana keletin bolady.
«Ekonomıkadaǵy qurylymdyq ózgerister, jergilikti bilikti maman tapshylyǵy jaǵdaıynda onyń ınnovatsııalyq jańǵyrýy Qazaqstanǵa sheteldik jumys kúshiniń aǵylýyna ákep soqty. Máselen, daǵdarysqa deıingi kezeńde Qazaqstan ekonomıkasyna jyl saıyn 100 shaqty elden keletin 25 myńnan 59 myńǵa deıin sheteldik mamandar tartylǵan», dedi T. Dúısenova.
