Jańa jyldyq bezendirý: Almaty túgel jaryqtandyryldy
ALMATY. KAZINFORM — Almaty qalasy bıyl Jańa jyldy erekshe toılap jatyr. Áýejaıdan Іle Alataýynyń etegine deıin shahar túgel jaryqtandyrylǵan. Kazinform agenttiginiń fototilshisi qalanyń merekege daıyndyǵyn sýretke túsirý úshin mańyzdy oryndardy aralady.
Merekege oraı, tek qala ortalyǵy emes, sondaı-aq shet aımaqtar da bezendirilgen.
Basty kórikti jerler, ádettegideı, Abaı jáne Astana alańdary boldy. Onda shyrshalar ornatylyp, turǵyndar men qonaqtardy merekeniń basty keıipkerleri Aıaz Ata men Aqshaqar qarsy alady. Munda balalar men eresekter estelik sýretke túsý úshin kezekke turady.
Sondaı-aq, Panfılov pen Arbat kósheleri, 28 gvardııashy-panfılovshylar saıabaǵynda jáne «Almaty Arena» men «Atakent» mańynda shyrshalar, jaryq ınstallıatsııalary ornatyldy. Bul oryndar dástúrli túrde jergilikti turǵyndar men týrısterdi tartý ortalyqtary bolyp sanalady. Munda kontsertter, jármeńkeler jáne ártúrli is-sharalar ótedi.
Bıylǵy jyly qalanyń túkpir-túkpiri bezendirildi. Endi merekelik kóńil-kúıge ený úshin qala ortalyǵyna barýdyń qajeti joq.
Jańa jyl merekesine oraı, jańa 13 jerde - Saıran kóli, «Gúlder» jáne «Family Park» saıabaqtary, Gandı jáne Baıseıitova alańy, Aınabulaq, Jasqanat, Kókjıek jáne Qulager shaǵyn aýdandaryna sahnalyq dekoratsııa ornalastyryldy.
Ertegi keıipkerleriniń jaryqtandyrylǵan keıipi, alyp qar keskini jáne jarqyraǵan buǵylar aýlalar men jergilikti saıabaqtarda jańa jyldyq atmosfera týdyrdy. Qazir munda qala turǵyndary kúndelikti serýen quryp júr.
Qoıý qarańǵy tússe de Almaty jap-jaryq kúıde qala beredi. Shahardyń 38 shaqyrymnan astam kóshesi gırlıandalar ilinip, bezendirildi. Áýejaıdan shyqqan qala qonaqtaryn túrli-tústi shamdar qarsy alyp, qala ortalyǵyna deıin jol silteıdi.
Quljyn tas joly men Shyǵys aınalma joly da (EBR) merekege saı bezendirilgen.
Aıta keteıik, Jańa jyl merekesine oraı, Almatyda ótetin sharalardy myna siltemeden kórýge bolady.