Jańa jyldy poıyzda qarsy alady: mereke kúnderi 1 600 jolserik kezekshilikke túsedi
ASTANA. KAZINFORM — Merekede elimizdiń temirjol kóligi demalys jáne mereke kúnderine qaramastan 24/7 rejıminde jumys isteıdi.
Sala qyzmetkerleri jolaýshylar men júkterdi úzdiksiz jáne senimdi tasymaldaýdy, sondaı-aq temirjol ınfraqurylymynyń turaqty jumysyn qamtamasyz etedi. Kóptegen temirjolshy poıyzdar qozǵalysy men jolaýshylardyń qaýipsizdigin qamtamasyz ete otyryp, Jańa jyldy jolda qarsy alady.
QTJ baspasóz qyzmetiniń málimetinshe, jańa jyl qarsańynda júk qozǵalysynyń 1 685 mashınısi, jolaýshylar poıyzdarynyń 357 mashınısi men sharýashylyq jáne manevrlik qozǵalystyń 698 mashınısi kezekshilikke túsedi.
— Temirjol vokzaldarynda mereke kúnderi «Jolaýshylar tasymaly» AQ-nyń 122 bılet kassasy, onyń 40-y 31 jeltoqsannan 1 qańtarǵa qaraǵan túni jumys isteıtin bolady. Jańa jyl qarsańynda poıyzdarǵa 81 poıyz brıgadasy jáne 1 600 astam jolserik tartylatyn bolady, — delingen habarlamada.
Merekelik túnde poıyz brıgadalarymen qatar vokzaldar boıynsha kezekshiler, anyqtamalyq bıýro qyzmetkerleri, tasymaldaýdy basqarý ortalyqtarynyń dıspetcherleri, jol monterleri jáne poıyzdar qozǵalysynyń qaýipsizdigi, júkterdiń saqtalýy jáne temirjoldaǵy tártiptiń úılesimdi jumysyna qatysy bar basqa da mamandar qyzmet atqarýdy jalǵastyrady.
Budan buryn jolaýshylar shaǵymynan keıin Aqtóbe — Mańǵystaý poıyzynyń vagondary jańartylǵanyn jazǵan edik.
