Jańa jyldan keıin páter qymbattaı ma – sarapshy pikiri

ASTANA. KAZINFORM –  Baspana naryǵyndaǵy baǵa ózgeristeri memlekettik baǵdarlama arqyly salynatyn úılerdiń baǵasyna áser etpeıdi. «Qazaqstan turǵyn úı kompanııasy» AQ tóraǵasynyń orynbasary Oljas Salyqov «KHC Workshop-2024» sharasynda osyndaı paıym aıtty.

«Halyq arasynda «Jańa jylǵa deıin páter satyp alyp úlgerip qalý kerek. 1 qańtardan bastap baspana baǵasy qymbattaıdy eken», - deıtin áńgime kóp aıtylyp ketti. Onyń ústine Salyq kodeksindegi qosylǵan qun salyǵy qurylys kompanııalaryna da qatysty bolatyny, al bul úı baǵasyna tikeleı áser etetini aıtylyp júr. «Qazaqstan turǵyn úı kompanııasy» AQ basqarma tóraǵasynyń orynbasary Oljas Salyqovtan osyndaı suraqtarmen basy qatyp júrgen qazaqstandyqtarǵa qandaı keńes beretinin suradyq.

Sarapshy mundaı baıbalam áńgimeniń memlekettik baǵdarlamalar arqyly salynatyn úılerge qatysy joq ekenin aıtady.

«Birinshi kezekte turǵyn úı qurylysynyń memlekettik baǵdarlamasynda búkil baǵalar bekitilgenin eskerý kerek. Ónerkásip jáne qurylys mınıstrligi ókiletti organ retinde ol baǵalardy aıqyndap bergen. Mundaı sharalar baspana jaldaý aqysyn, ıpoteka tólegen kezde áleýmettik turǵydan az qamtylǵan halyqtyń qaltasyna júk túspesin dep qabyldanǵan. Sondyqtan, baspana baǵasy týraly aıtqanda memlekettik baǵdarlamalar arqyly salynyp jatqan úılerdiń baǵasynyń ósetinin kútip otyrǵan joqpyz. ıAǵnı, búkil baǵa bekitilgen. Tipti quqyqtyq aktilermen reglamenttelgen. Sáıkesinshe bul jerde táýekelder kórip otyrǵan joqpyz», - deıdi ol.

«QTK» AQ ókili kommertsııalyq baspana baǵasyna baılanysty boljam aıta almaıtynyn jetkizdi.

«Kommertsııalyq baspana baǵasyn suranys pen usynystyń qatynasy retteıtinin ózińiz de bilesiz. Memleket oǵan qatyspaıdy. Árıne, qurylystyń ózindik qunyna áser etetin materıaldyń baǵasy, ınflıatsııa sııaqty faktorlardy esepke alý kerek. Azamattardyń satyp alý qabileti de baǵaǵa áser etedi. Bul máselede árkim óz shamasyna qarap sheshim qabyldaǵan durys dep oılaımyn», - deıdi Oljas Salyqov.