Jańa jyldan bastap asyraýshysynan jáne eńbek qabiletinen aıyrylǵandar járdemaqysy ósedi

ASTANA. KAZINFORM — Eńbek jáne halyqty áleýmettik qorǵaý mınıstrligi eńbek qabiletinen jáne asyraýshysynan aıyrylǵandarǵa tólenetin járdemaqyny kóbeıtpek. Tıisti qaýly jobasy Ashyq NQA platformasynda jarııalanǵan. 

Qaýly jobasyna sensek, 2025 jyldyń 1 qańtarynan bastap asyraýshysynan jáne eńbek qabiletinen aıyrylǵandarǵa Áleýmettik memlekettik saqtandyrý qorynan tólenetin (2025 jylǵy 1 qańtarǵa deıin taǵaıyndalǵan) járdemaqyny 6,5 paıyzǵa ósirý josparlanyp otyr. 

Qujat 17 qyrkúıekke deıin qoǵam talqysynda bolady. 

Eske sala keteıik, bıylǵy 1 qańtarda kúnkóris mınımýmynyń kóbeıýine baılanysty múgedektigi bar jandarǵa jáne asyraýshysynan aıyrylǵandarǵa tólenetin áleýmettik tólem 7 paıyzǵa kóterilgen edi. 

Úkimet qaýlysymen eńbek qabiletinen aıyrylǵandar járdemaqysy da bıyl 7 paıyzǵa ósti.