Jańa jyldaǵy tartý: jarqyn shoý men juldyzdar sherýi
ASTANA. KAZINFORM – Jibek Joly/Silk Way telearnasy Jańa jyldy aýqymdy merekelik marafonmen qarsy alýǵa daıyn. 31 jeltoqsan kúni tańerteń bastalatyn efır 1 qańtar kúni tańda «Merekelik kóńil-kúı» baǵdarlamasymen jalǵasady.
Jibek Joly telearnasynyń kórermenderi sol kúni Memleket basshysynyń Jańa jyldyq quttyqtaýyna daıyndyq josparymen tanysa alady. Sondaı-aq, Esil ózeniniń jaǵalaýynan tikeleı efırler men merekelik reportajdar júrgiziledi.
Telearna merekelik túnde jarqyn kontsertter, retrofılmder, juldyzdardyń quttyqtaýlary men qarapaıym qazaqstandyqtardyń shynaıy oqıǵalaryn bir arnaǵa toǵystyrmaq.
Ótken jyldyń sońǵy kúniniń basty oqıǵasy – «Jaqsy adam 2025» arnaıy syılyǵynyń tabystaý rásimi. Marapat eldiń damýyna eleýli úles qosqan mamandar men eńbek adamdaryn, erligimen elge úlgi bolǵan azamattardy, sondaı-aq júregi meıirimge toly, jaqsy isteri qoǵamǵa úlgi bolǵan jandardy qurmetteý úshin beriledi. Saltanatty rásimge memleket jáne qoǵam qaıratkerleri, belgili tulǵalar men óner juldyzdary qatysady.
Sonymen qatar «Kesh Emes» jobasy aıasynda túsirilgen «Jańa jyl – jańa shabyt» merekelik kontserti Jańa jyldyq baǵdarlamanyń basty erekshelikteriniń biri bolady. Sahnada qazaqstandyq ártister men jobanyń qatysýshylary óner kórsetip, tyńdarmanǵa tanymal hıtterdi, jańa kompozıtsııalar men halyq ánderin usynady. «Kesh Emes» - kásibı nemese áleýmettik mártebesine qaramastan, shyǵarmashylyq áleýetin ashýǵa umtylatyn áıelderdi jappaı qoldaıtyn biregeı joba.
31 jeltoqsanda Nurlan Qoıanbaev júrgizetin «Jańa túngi stýdııa» baǵdarlamasyna «Qaırat» fýtbol klýbynyń oıynshylary, sonyń ishinde 2025 jyly Chempıondar Lıgasynyń úzdik qaqpashysy atanǵan Temirlan Anarbekov qatysady. Baǵdarlamaǵa Apple Music chartynda bıylǵy jyly aldyńǵy orynǵa shyqqan ánshi Yenlik, tanymal vıdeograf Dastan Muhamedrahym da kelmek. Sondaı-aq hedlaınerler qatarynda Zengir, Rahat Dilmuhamed, Nazarbek, Yenlik jáne ALEM bar.
«Búgin.live» baǵdarlamasynda elimizdiń jetistikteri, qabyldanǵan zańdar, mańyzdy is-sharalar men ekonomıkaǵa tartylǵan ınvestıtsııalar týraly tolyq sholý beriledi.
Jibek Joly telearnasy kórermenderge Silk Way Star halyqaralyq jobasynyń Jańa jyldyq gala-kontsertin usynady. Sahnada qazaqstandyq jáne sheteldik jas oryndaýshylar óner kórsetedi. Qazaqstan men Azııanyń tanymal ártisteri qatarynda Ońtústik Koreıadan Shın Mın Chol («F4» doramasynyń «Paradise» saýndtreki), Malaızııadan ıAzmın Azız, Armenııadan Saro Gevorgıan jáne Qyrǵyzstannan Gúljıgıt Qalykov bar. Aıta keteıik, Silk Way Star – 12 eldiń qatysýymen ótken alǵashqy azııalyq mýzykalyq megajoba, al onyń jeńimpazy mońǵolııalyq Mıshel Djozef atandy.
Jańa jylǵa arnalǵan merekelik baǵdarlamalar elde keń aýqymda usynylmaq. «Qazaqstan» telearnasynyń jańa maýsymdaǵy basty jańalyǵy – «Jaqsylyqpen kel, jańa jyl!» shoý-kontserti. Baǵdarlamada ánderdiń shyǵý tarıhy beınematerıaldarmen tolyqtyrylyp, ártister jańa obrazdarda tamsandyrady. Kórermenge jyldyń úzdik hıtteri, ázil-syqaq nómirler men kútpegen qoıylymdar usynylady. Shoýdy Darhan Rahymjan, Nazerke Nurtas pen taǵy basqa tanymal júrgizýshiler júrgizedi.
Al «Astana TV» arnasy «Jańa jylǵa – jańa arman» mýzykalyq-komedııalyq shoýymen merekelik kóńil-kúı syılaıdy. Baǵdarlama kontsert, mını-fılm, realıtı-shoý jáne teatrlandyrylǵan qoıylymdardy biriktiredi. 40 mýzykalyq nómir oryndalyp, uzaq ýaqyt sahnadan kórinbegen súıikti ártister qaıta oralady. Sondaı-aq, qarapaıym adamdar alǵash ret sahnaǵa shyǵyp, jaqyndaryna mýzykalyq tosyn syı jasaıdy. Abaı atyndaǵy Opera jáne balet teatrynyń hor men orkestri de merekelik atmosferany tolyqtyrady.
«7 arna» efırdi «Jańa jylǵa – jańa qurmetpen» baǵdarlamasymen kómkermek. Efırdiń negizgi ıdeıasy – eńbek adamdarynyń jáne qoǵamdaǵy mańyzdy mamandyqtardyń mánin ashý. Baǵdarlamada jyldyń hıtteri, retroánder, sport, mádenıet, qoǵamdyq bastamalar týraly shabyttandyratyn oqıǵalar usynylady. Tanymal telejúrgizýshi Dınara Sátjan stýdııada jyldyń basty keıipkerlerin qarsy alyp, san salanyń syryn ashpaq.
«Habar» telearnasy 45 tanymal oryndaýshy qatysatyn aýqymdy kontsert uıymdastyrady. Baǵdarlamada tanymal ánder men jańa kompozıtsııalar oryndalady. Negizgi taqyryptar qatarynda Konstıtýtsııa men «Habar» agenttiginiń mereıtoılary, Abaı Qunanbaıulynyń 180 jyldyǵy, Nurǵısa Tilendıevtiń 100 jyldyǵy, Qazaqstannyń EXPO-2025 kórmesine qatysýy jáne ishki týrızmdi damytý bar. Kontsertke deıin dástúrli «Qyzyq premııa» tabystalady, ol medıa keńistiktegi jyldyq qorytyndyny ázil-syqaq formatynda usynyp, bıyl erekshelengen jandardy sahna tórine shyǵarady.
«MIR» telearnasynyń efırinde Astanadaǵy úsh aýysymdyq oqytý máselesiniń sheshimi, 2025 jylǵy EKO protsedýralarynyń ósýi jáne eksporttaǵy jetistikter týraly sıýjetter usynylady. Mádenı baǵdarlamada «Şelkýnchık» baleti, marafonshylardyń qysqy jattyǵýlary, taý týrızmi jaıly reportajdar qarastyrylǵan. Keler jyl Qazaqstanda Bilim men ǵylymı zertteýler jyly dep jarııalanyp, barlyq azamattarǵa arnalǵan tegin dıagnostıkanyń keńeıtilýi habarlanady. Jańa jyl tabaldyryqqa enemin degenshe «Dıskoteka Avarııa» mýzykalyq shoýy merekelik kóńil-kúı syılaıdy.
«Eýrazııa birinshi arnasy» da saqadaı saı. Arna «Qosh keldiń, 2026! Dobro pojalovat, 2026!» baǵdarlamasymen erekshelenbek. Shoý 2,5 saǵat buryn bastalyp, saǵat túngi 12-ge deıin sozylady jáne úsh merekelik lokatsııany biriktiredi. Tanymal ártister ótken jyldyń qorytyndysyn taldaıdy. Baǵdarlama otbasylyq dástúrdiń mańyzyn ashýǵa den qoımaq, sonymen birge mýzykalyq nómirler men qoıylymdar da shet qalmaıdy. Qonaqtar qatarynda halyqaralyq baıqaýlardyń jeńimpazdary, tanymal shoýmender men elimizdiń halyq ártisteri bar.