Jańa jylda Ulttyq ulannyń 3 myńǵa jýyq qyzmetkeri kúsheıtilgen rejımde jumys isteıdi
ASTANA. KAZINFORM — Áskerlerdiń jeke quramynyń aldynda qoǵamdyq tártipti saqtaý jáne azamattardyń qaýipsizdigin qamtamasyz etý boıynsha naqty mindetter tur, dep habarlaıdy QR ІІM Ulttyq ulany.
Jańa jyldyq merekelerde QR ІІM Ulttyq ulanynyń áskerı qyzmetshileri polıtsııa qyzmetkerlerimen birlesip, azamattardyń qaýipsizdigin qamtamasyz etip jáne qoǵamdyq tártipti saqtaı otyryp, qyzmet atqarýdy jalǵastyrýda. Patrýlder eldiń barlyq qalalarynda turǵyndardyń tynyshtyǵyn qorǵaıdy jáne kúsheıtilgen rejımde jumys isteıdi.
Áskerlerdiń jeke quramynyń aldynda qoǵamdyq tártipti saqtaý jáne azamattardyń qaýipsizdigin qamtamasyz etý boıynsha naqty mindetter tur.
— Bizdiń jaýyngerler árqashan asqan jaýapkershilikpen jáne abyroımen qyzmet etedi. Mereke kúnderi elimizdiń turǵyndary men qonaqtary otbasy men dostarynyń ortasynda demalýdy jón kóredi. Kóbisi konkı tebýge, syrǵanaýǵa, qala ortalyqtarynda kóńil kóterýge shyǵady. Tıisinshe, jeke quram adamdar kóp jınalatyn oryndarda bolady jáne qaýipsizdiktiń tıisti deńgeıin qamtamasyz etedi, — dep atap ótti QR UK Bas qolbasshylyǵynyń qoǵamdyq tártipti saqtaýdy uıymdastyrý bóliminiń bastyǵy polkovnık Baýyrjan Qumarov.
Quqyq tártibin tıisti qamtamasyz etý, sondaı-aq quqyq buzýshylyqtardyń aldyn alý jáne jolyn kesý maqsatynda QR ІІM Ulttyq ulanynyń 3 myńǵa jýyq ofıtserleri, serjanttary men sarbazdary, sondaı-aq 60-tan astam avtotehnıka jumyldyrylatynyn atap ótken jón.
Eske salsaq, budan buryn Ulttyq ulan sarbazdary bıyl qandaı qylmystardy ashýǵa atsalysqanyn jazdyq.