Jańa jylda polıtsııaǵa 11 myńnan astam qońyraý tústi — ІІM
ASTANA. KAZINFORM — QR Іshki ister mınıstrligi el aýmaǵynda Jańa jyl merekesiniń tynysh ári qaýipsiz ótkenin habarlady. Mınıstrliktiń málimdeýinshe, merekelik kezeńde polıtsııa qyzmetkerleri kúsheıtilgen qyzmet rejımine kóshken.
31 jeltoqsan men 1 qańtar aralyǵynda polıtsııanyń «102» jedel jelisine 11 448 qońyraý túsken. Onyń ishinde 3 082 ótinish túngi ýaqytta tirkelgen. Habarlamalardyń basym bóligi anyqtama alý sıpatynda bolǵan.
ІІM málimetinshe, turǵyndar kóbine pırotehnıkalyq buıymdardy paıdalaný tártibi, muz aıdyndary men jańa jyldyq shyrshalardyń ornalasqan jeri týraly suraǵan. Sonymen qatar syrǵanaqtarda adasyp ketken balalar, durys qoıylmaǵan kólikter men joldan shyǵýǵa baılanysty qıyndyqtar jóninde de habarlamalar túsken.
Jalpy alǵanda, vedomstvo deregine sáıkes, Jańa jyl túni elde eleýli quqyqbuzýshylyqtar tirkelmegen. Qoǵamdyq oryndar men kóshelerde aýyr jáne asa aýyr qylmystar bolmaǵan.
Aıta keteıik, Almatyda Jańa jyl túni pırotehnıkadan 20 adam zardap shekken.