Jańa jylda muǵalimderge jappaı syıaqy berile me — mınıstrlik jaýaby

ASTANA. KAZINFORM — Ortalyq kommýnıkatsııalar qyzmetinde ótken baspasóz máslıhatynda Oqý-aǵartý mınıstrligi Orta bilim berý komıtetiniń tóraǵasy Jumashev Qanybekke osyndaı suraq qoıyldy. 

— Memlekettik meıramdar qarsańynda tólenetin syıaqy ár bilim berý uıymynyń jyldyq bıýdjetinen únemdelgen qarjy esebinen beriledi. Bizge kelgen aqparat boıynsha, ásirese basqarý formasy ózgergen, sharýashylyq júrgizý quqyǵyna ıe bolǵan mektepterde bul jaǵynan jaqsy úrdis bar. Ár memlekettik meıram qarsańynda pedagogterge belgili bir syıaqy tólenip otyr. Syıaqy tek mektep bıýdjetinen únemdelgen qarjy esebinen tólenedi, — dep jaýap berdi Jumashev Qanybek.

Onyń aıtýynsha, muǵalimderdiń meıram saıyn syıaqy alý máselesi ár aýdannyń qarjylyq múmkindigine baılanysty.

— Bir eskeretin másele bar. Bilim berý júıesinde tiginen, vertıkaldi basqarý júıesi ornyqqan. Mysaly, bilim basqarmalaryna aýdandyq bilim bólimderi, ol bólimderge mektepter baǵynyshty. Ár aýdandyq bilim bóliminiń qarjysy bólek-bólek jasaqtalady. Elimizde 8 myń mektep bolsa, 220 aýdandyq bilim bólimderi osy bilim oshaqtarynyń jyldyq qarjy esepterin qabyldap, jańa jyldaǵy qarjy qoryn bekitip otyrady. Sondyqtan bul másele tikeleı sol aýdannyń nemese qalanyń bıýdjettegi kirisine baılanysty. Syıaqy máselesi qaı aýdanda qarjy tabý kózi kóp bolsa, mektepterge teń bólip berilse, syıaqy alý yqtımaldyǵy joǵary, — dedi komıtet basshysy.

Eske salsaq, Ulttyq bank tóraǵasy Tımýr Súleımenov bank top-menedjerleriniń 1,7 mlrd teńge kóleminde syıaqy alǵany týraly aqparatqa túsinikteme bergen bolatyn.