Jańa jylda Qytaıdan Qazaqstan men Ózbekstanǵa kelgen týrıster legi eki esege artty

ASTANA. KAZINFORM — 1–3 qańtar aralyǵyndaǵy jańa jyldyq demalys kezeńinde Azııa Qytaı Halyq Respýblıkasynan shyqqan týrıster úshin eń tanymal saıahat baǵytyna aınaldy. Bul týraly Kazinform agenttiginiń menshikti tilshisi jergilikti BAQ-qa silteme jasap habarlady.

Qunar jetekshi týrıstik onlaın-platformasynyń esebine sáıkes, jańa jyl merekesi kezinde shetelge saıahattaýdy josparlaǵan qytaılyq týrısterdiń tańdaýy Azııa elderine  túsken. Al sheteldik baǵyttar boıynsha Seýl kósh basynda.

Alaıda eń aıqyn ósim Qazaqstan, Ózbekstan jáne Grýzııa elderinde baıqaldy. Bul memleketterge áýe bıletterin brondaý sany ótken jyldyń osy kezeńimen salystyrǵanda eki esege artqan. Sala sarapshylary mundaı joǵary suranysty QHR azamattary úshin vızasyz rejımniń engizilýimen baılanystyryp otyr.

Sonymen qatar, elderge keletin kirme týrızm segmentinde de sheteldik qonaqtardyń kúrt kóbeıýi tirkeldi. Erekshe qyzyǵýshylyq Qytaıdyń ońtústiginde ornalasqan Haınan araldyq provıntsııasyna aýdy. Buǵan ótken jyldyń jeltoqsan aıynda búkil aral aýmaǵynda «táýelsiz kedendik operatsııalar» rejıminiń iske qosylýy sebep bolyp, týrıstik naryqtyń jandanýyna serpin berdi.

Sheteldik azamattar arasynda brondaý kórsetkishiniń ósý qarqyny boıynsha Sanıa qalasy kósh bastady — bul jerde kórsetkish 5 esege artqan. Al Haıkoý qalasynda brondaý kólemi 3 esege ósti. Qańtardyń basynda Haınanǵa kelgen sheteldik týrısterdiń negizgi legin Malaızııa, Taıland, Ońtústik Koreıa, Vetnam, Aýstralııa jáne Reseı elderiniń azamattary qurady.

Aıta keteıik, Qazaqstanda týrızm salasyna tartylǵan ınvestıtsııa kólemi 38,1%-ǵa ósti.