Jańa jyl túninde 15 atyraýlyq otbasynyń shyrqyn buzǵan

ATYRAÝ. KAZINFORM – Atyraýda jańa jyl túninde otbasynyń tynyshtyǵyn buzǵan 15 adam polıtsııaǵa jetkizildi.

Atyraý oblystyq polıtsııa departamenti baspasóz qyzmetiniń málimetine súıensek, búgin tańǵa deıin tártip saqshylaryna 205 shaqyrtý túsken.

– Jańa jyl túninde polıtsııaǵa 201 habarlama tústi. Kópshilik is-shara kezinde balalardyń ata-analarynan adasyp qalý deregi tirkelmedi. Kóshelerde buzaqylyq áreketi tirkelmedi. Alaıda otbasynyń shyrqyn buzǵan 15 adam anyqtalyp, polıtsııa bólimderine jetkizildi. Jol boıynda 25 jol-kólik oqıǵasy tirkeldi, - dep habarlady departamenttiń baspasóz qyzmeti.

Atyraý oblystyq polıtsııa departamentiniń bastyǵy, polıtsııa general-maıory Nurhat Orazbaevtyń aıtýynsha, jańa jyl merekesine oraı turǵyndardyń tynyshtyǵy men qoǵamdyq qaýipsizdikti qamtamasyz etý úshin polıtseıler kúsheıtilgen rejımde qyzmet atqarýda.

– Bizdiń basty maqsatymyz – turǵyndardyń qaýipsizdigin qamtamasyz etý. Óıtkeni mereke kúnderi jaıaý júrginshilerdiń de, kóliktiń aǵyny artady. Osyǵan baılanysty polıtsııanyń jeke quramy qoǵamdyq tártipti saqtaý, qala men aýyldardaǵy kóshelerde quqyq buzýshylyqtardyń aldyn alý maqsatyndaǵy tıisti jumystardy atqarady. Pırotehnıka saldarynan bolýy múmkin oqys oqıǵalardy boldyrmaýdy basty nazarda ustaıdy, -deıdi Nurhat Orazbaev.

Eske sala ketelik, buǵan deıin atyraýlyq 122 oqýshy jańa jyldy Reseıdegi emdeý pansıonatynda qarsy alatynyn jazǵan bolatynbyz.