Jańa jyl túni Qazaqstan qalalarynda aýa raıy qandaı bolady

ASTANA. KAZINFORM — «Qazgıdromet» RMK Qazaqstan óńirlerindegi mereke aldyndaǵy kúnder men Jańa jyl qarsańyndaǵy aýa raıy boljamyn usyndy.

Aldaǵy kúnderi belsendi soltústik-batys tsıklonynyń áserinen eldiń barlyq derlik óńirinde jaýyn-shashyn bolady. Sınoptıkterdiń málimetinshe, oblystardyń basym bóliginde qar jaýady, al ońtústikte jaýyn-shashyn qar men jańbyr túrinde túsedi.

26 jeltoqsannan bastap respýblıka boıynsha aýa raıynyń nasharlaýy kútiledi: boran soǵyp, jel kúsheıedi, al batys jáne ońtústik oblystarda kóktaıǵaq bolýy múmkin.

— Alaıda 27 jeltoqsanda tsıklonnyń ornyn sýyq batys antıtsıklony basyp, jaýyn-shashyn birtindep toqtap, aýa temperatýrasy tómendeıdi: túnde eldiń soltústik-batysy men soltústiginde –25…–30 gradýsqa deıin, shyǵysynda –22…–30 gradýsqa deıin sýytady, — dedi «Qazgıdromet» RMK baspasóz hatshysy Arýjan Muratova.

Sonymen qatar sınoptıkter 31 jeltoqsan men 1 qańtarda aýa temperatýrasy salystyrmaly túrde qolaıly bolatynyn atap ótti.

— Jańa jyl qarsańynda qazaqstandyqtardy naǵyz qysqy aýa raıy kútip tur: jekelegen óńirlerde qar jaýyp, jaıaý burqasyn bolady, keı ýaqytta jel kúsheıedi, al eldiń ońtústik bóliginde qar aralas jaýyn jaýady, — dedi «Qazgıdromet» ókili.

Jańa jyl túni aıaz bolady: aýa temperatýrasy –1…–9 gradýs aralyǵynda, kúndiz shamamen 0 gradýs bolady. Ońtústikte kúndiz aýa +5…+13 gradýsqa deıin jylynady, alaıda 1 qańtarda temperatýra 0…–5 gradýsqa deıin tómendeıdi.

Astanada mereke kúnderi qar, jaıaý burqasyn, kóktaıǵaq jáne jeldiń kúsheıýi boljanyp otyr. Túnde aýa temperatýrasy –0…–2 gradýs, kúndiz shamamen 0 gradýs bolady.

Almatyda aýa temperatýrasy salystyrmaly túrde joǵary — +3…+5 gradýs shamasynda. Kúndiz jańbyr jaýyp, keıin qarǵa ulasýy múmkin.

Buǵan deıin habarlanǵandaı, Qazaqstanda 2025–2026 jyldardaǵy qys qalypty jyly bolady dep kútiledi. Eldiń basym bóliginde jaýyn-shashyn mólsheri klımattyq norma sheginde túsedi.