Jańa jyl: Merekelik keshterdi qandaı ǵımarattarda ótkizýge tyıym salynady

Tótenshe jaǵdaılar mınıstrliginiń resmı ókili Janna Dáýrenbekova ortalyq kommýnıkatsııalar qyzmetinde ótken brıfıngide Jańa jyl merekesi qarsańynda qandaı saqtyq sharalaryn qaperde ustaý kerektigin aıtty, dep habarlaıdy Kazinform.

«Elimizde kúnine orta eseppen 20-30 órt tirkeledi. Jańa jyl merekesi qarsańynda olardyń sany eki ese artady. Mysaly, byltyr 31 jeltoqsanda 40 órt tirkelip, 4 adam qaza tapty. Al 1 qańtarda – 42 órt tirkelip, 3 adam qaza tapty. Aıta ketý kerek, órttiń kóbi turǵyn úı sektorynda bolady», - deıdi resmı ókil.

Onyń sózinshe, qalypty jaǵdaıda eldegi órtterdiń 60%-y turǵyn úılerde bolady. Al Jańa jyl merkesi kezinde bul kórsetkish 80%-ǵa deıin artady.

Merekeler kezinde adamdardyń qyraǵylyǵy aıtarlyqtaı tómendeıdi.

«Uıym basshylary jappaı merekelerdi ótkizý kezinde myna máselelerdi eskerý kerek:

- keminde eki evakýatsııalyq esigi bar, terezelerinde tor ornatylmaǵan, ekinshi qabattan bıik emes jerde ornalasqan keńistikti paıdalaný qajet;
- shyrsha qurǵan kezde butaqtary qabyrǵa men tóbege tımeıtindeı etip, úıdegi qozǵalysqa kedergi keltirmeıtindeı, esikterdi jolyn jappaıtyndaı etip etip ornatý kerek;
- elektr qýatyna jalǵanatyn sándik buıymdardy tehnıkalyq normalardy saqtaı otyryp qurý kerek;
- is-sharalardy ótkizgen kezde sahna men zaldarda órt qaýipsizdigine jaýapty mamandar kezekshilik etý qajet», - dedi Janna Dáýrenbekova.
Vedomstvonyń resmı ókili Jańa jyl merekesi kezinde qandaı áreketterge qataı tyıym salynatynyn aıtty. Olar:
- úı nemese ǵımarat ishinde órt qaýpi joǵary otshashý uıymdastyrý;
- merekelik kesh ótetin zaldaǵy joldardyń enin taryltý, adam júretin joldarǵa qosymsha oryndyqtar qoıý;
- is-shara kezinde bólmedegi jaryqty tolyǵymen óshirý;
- úı-jaıdy belgilengen normadan artyq adamdarmen toltyrý.

«Elimizde jyl saıyn júzden astam adam pırotehnıkalyq ónimderden zardap shegedi, onyń 30 paıyzy – balalar. Petarda, otshashýlardy satyp alǵanda eń aldymen, ónimniń sertıfıkaty týraly qujat surańyz jáne pırotehnıkalyq zattardy paıdalaný erejelerimen mindetti túrde tanysyńyz.

Ásirese saqtaý merzimine nazar aýdarýdy umytpańyz. Eger taýardyń jaramdylyq merzimi ótip ketse, olardy múlde paıdalanýǵa bolmaıdy. Qaptama buzylmaǵan jáne jyrtylmaǵan bolý kerek. Pırotehnıkalyq zattardy ushyrý kezinde temeki shegýge qatań tyıym salynady. Kólikterdiń janynda pırotehnıkany atýǵa bolmaıdy. 50 metr radıýsta órt qaýipti obektiler bolmaýy kerek.

Kórermender feıerverkterdi ushyrý alańynan 15-20 metr qashyqtyqta bolýy kerek. Ónimdi qolda ustap atýǵa tyıym salynady», - deıdi resmı ókil.

Sondaı-aq, ol «bengal shamyn» janǵysh materıaldardan alys paıdalaný kerektigin eskertti.