Jańa jyl keshinde jol jaǵdaıy qandaı bolady
ASTANA.KAZINFORM – «QazAvtoJol» ulttyq kompanııasy 2025 jylǵy 30 jeltoqsan men 2026 jylǵy 4 qańtar aralyǵynda elimizdiń birqatar óńirinde aýa raıy qubylmaly bolatynyn habarlady.
Atmosferalyq fronttar men tsıklondyq úderisterdiń áserinen jaýyn-shashyn túsip, temperatýra kúrt qubylyp, jel kúsheıip, tuman basyp, kóktaıǵaq qaýpi artady. Mundaı jaǵdaıda respýblıkalyq mańyzy bar avtojoldarda qozǵalys qaýipsizdigi kúsheıtiledi.
Erteń eń kúrdeli ahýal soltústik óńirlerde (SQO, Qostanaı, Aqmola jáne Pavlodar oblystary) bolady: qar jaýyp, boran soǵyp, jel ekpindep, túnde aýa temperatýrasy tómendeıdi, tuman túsip, jol beti muzdanýy yqtımal. Keı jerlerde qar úıindileri paıda bolyp, ashyq alqaptarda kóriný qashyqtyǵy kúrt tómendeýi múmkin.
Ortalyq óńirlerde (Qaraǵandy, Ulytaý) qar jaýady, aýa temperatýrasy 0 C mańynda qubylady. Ásirese túngi jáne tańǵy ýaqytta joldyń betinde muz paıda bolýy múmkin.
Batys aımaqtarda (BQO, Atyraý, Mańǵystaý, Aqtóbe oblystary) qar, boran, tuman jáne kóktaıǵaq bolady dep boljanady. Ashyq ýchaskelerde qar uıytqyp, kóktaıǵaq yqtımal.
Ońtústik jáne ońtústik-shyǵysta (Túrkistan, Jambyl, Almaty, Jetisý oblystary) kúndiz aýa temperatýrasy jyly bolyp, jaýyn jańbyr jáne sýly qar túrinde túsýi múmkin. Túnde jáne azanda, ásirese kópirler men estakadalarda kóktaıǵaq qaýpi saqtalady. Taýly óńirlerde jol jaǵdaıy kúrdelenýi yqtımal.
Jalpy alǵanda aldaǵy kúnderi kóktaıǵaq, tuman saldarynan kórinýdiń tómendeýi, qar úıindileri jáne soǵan baılanysty qozǵalystyń baıaýlaýy nemese ýaqytsha shektelýi múmkin (soltústik, ortalyq jáne batys óńirler).
Aıryqsha nazar aýdaramyz: erteń kúnniń birinshi jartysynda Aqmola oblysynda aýa raıy nasharlaýy yqtımal. Osyǵan baılanysty óńir boıynsha barlyq baǵytta qozǵalysqa ýaqytsha shekteý engizilýi múmkin, ásirese «Astana – Şýchınsk» baǵytynda.
Aqmola oblysynyń týrıstik oryndaryna, sonyń ishinde Býrabaı baǵytyna barýdy josparlaǵan azamattarǵa jolǵa shyǵar ýaqytty aldyn ala oılastyryp, balamaly kólik túrin qarastyrǵan jón nemese sapar ýaqytyn qaýipsiz kezeńge yńǵaılaǵan durys.
Mereke kúnderi ulttyq kompanııa kúsheıtilgen rejımde jumys isteıdi: respýblıkalyq joldarda 1700-den astam arnaıy tehnıka jumyldyrylady, táýlik boıy 2500-ge jýyq qyzmetker kezekshilik atqarady.
Júrgizýshilerge úndeý: jyldamdyqty joldyń naqty jaǵdaıyna saı tańdańyz, araqashyqtyqty ulǵaıtyńyz, taıǵaq jolda kúrt manevr men orynsyz basyp ozýdan saqtanyńyz, ýaqytsha shekteýler men jol qyzmetiniń nusqaýlaryn qatań oryndańyz. Eń bastysy – mas kúıde kólik basqarmańyz. Respýblıkalyq avtojoldardyń jaı-kúıi men engizilgen shekteýler týraly ózekti aqparatty 1403 nómiri arqyly bilýge bolady.
Aıta keteıik, QazAvtoJol eki oblysta kólik qozǵalysyna shekteý qoıylǵanyn habarlady.