Jańa jyl qarsańynda úsh megapolıs arasynda qosymsha Talgo poıyzdary qatynaıdy

ASTANA. KAZINFORM — Astana, Almaty jáne Shymkent qalalary arasynda qosymsha Talgo poıyzdary qatynaıdy. Bul týraly «Jolaýshylar tasymaly» AQ baspasóz qyzmeti málimdedi.

Osy jyldyń jeltoqsan aıynan bastap jolaýshylar arasynda suranysy joǵary baǵyttar boıynsha № 101/102 «Astana-Almaty» jáne № 111/112 «Astana-Shymkent» qosymsha Talgo poıyzdary qatynaıdy. Bul baǵyttar poıyzdardyń «pakettik» qozǵalys kestesi aıasynda uıymdastyrylǵan.

Qosymsha poıyzdarǵa bıletterdi jóneltýge 45 kún qalǵanda bilet.railways.kz saıtynan nemese vokzaldardaǵy «Jolaýshylar tasymaly» AQ kassalarynan satyp alýǵa bolady. Ótken jyly «pakettik» keste negizinde Astana-Shý-Astana ýchaskesi boıynsha 4 poıyz iske qosylǵan bolatyn. 
Bul ádis reısterdiń tıimdiligin edáýir arttyryp, jolaýshylarǵa qyzmet kórsetýdiń qoljetimdiligin jaqsartýǵa múmkindik beredi. Poıyzdardyń «pakettik» qozǵalys kestesi «DB E& C» kompanııasymen birlesip júzege asyrylyp jatqan «Intermodaldy tasymaldar — HAB júıesi» jobasy sheńberinde engizilýde.

«Biz «Jolaýshylar tasymaly» AQ-men birlesip, marshrýttyq jelini ońtaılandyrýǵa arnalǵan ınnovatsııalyq sheshimder ázirleýdemiz. Bul jolaýshylarǵa qyzmet kórsetý sapasyn jaqsartyp, Qazaqstannyń iri qalalary arasyndaǵy qozǵalys jyldamdyǵyn arttyrýǵa múmkindik beredi», — dep atap ótti «DB E& C» kompanııasynyń ıntermodaldy tasymaldar boıynsha bas dırektory Nıkolaıs Sıdorovs.

Sondaı-aq, jolaýshylarǵa qolaıly jaǵdaı jasaý qaǵıdattaryn eskere otyryp, HAB ortalyqtaryndaǵy qala mańy jáne aralas kólik túrleriniń damýy aıasynda jańa temirjol marshrýttyq jelisin qurý múmkindigi qarastyrylady.

Eske salsaq, buǵan deıin Respýblıka kúni qarsańynda qosymsha poıyzdar qatynaıtyny aıtylǵan edi.