Jańa jyl qarsańynda polıtsııa kúsheıtilgen rejımde jumys istep jatyr
ASTANA. KAZINFORM – Jańa jyl merekesi qarsańynda Іshki ister mınıstrligi elimiz boıynsha «Quqyqtyq tártip», «Shyrsha» jáne «Pırotehnıka» atty jedel aldyn alý is-sharalaryn ótkizip jatyr.
Mereke kúnderdiń tynysh, qaýipsiz ári oqys oqıǵalarsyz ótýine baǵyttalǵan bul shara 20 jeltoqsannan 3 qańtarǵa deıin jalǵasady. Atalǵan is-sharalardyń basty maqsaty qoǵamdyq jáne jol qaýipsizdigin qamtamasyz etý, quqyq buzýdyń aldyn alý jáne qoǵamdyq tártipti saqtaý.
Olardyń mindeti árbir azamattyń jańa jyldy otbasymen, kóshede nemese merekelik alańdarda ómirine, densaýlyǵyna jáne múlkine qaýip tónbesten qarsy alýy úshin jaǵdaı jasaý. Polıtsııa basqa da qyzmettermen birlesip, kóshe, aýla, saýda oryndarynda jáne adamdar kóp jınalatyn jerlerde patrýldeýdi kúsheıtti.
Aldyn alý jáne túsindirý jumystary, sonyń ishinde jasóspirimder men jastar arasynda júrgizilip jatyr, jol qozǵalysy erejeleriniń, kóshi-qon zańnamasynyń saqtalýyna baqylaý jasalyp otyr, sondaı-aq alkogoldiń, esirtkiniń jáne ózge de tyıym salynǵan zattardyń zańsyz aınalymyna tosqaýyl qoıylyp jatyr.
Dál jańa jyl qarsańynda otshashý men petardalardy durys qoldanbaýdyń saldarynan jaraqat alý, órt shyǵý jáne jazataıym oqıǵalar sany kúrt artady. Osyǵan baılanysty polıtsııa órtke qarsy qyzmetpen birlesip, pırotehnıkalyq buıymdardyń aınalymyn baqylaý boıynsha jyl saıyn arnaıy is-sharalar ótkizedi. Bıyl tórt myńnan astam tekserý júrgizilip, shamamen bes júz zań buzýshylyq anyqtaldy, segiz myńnan astam sertıfıkattalmaǵan ári qaýipti pırotehnıkalyq ónim tárkilendi.
Pırotehnıkalyq buıymdardy tek arnaıy jáne resmı saýda oryndarynan ǵana satyp alý qajet. Sáıkestik sertıfıkatynyń bolýyna nazar aýdaryńyzdar, qoldaný nusqaýlyǵyn muqııat oqyp shyǵyp, ónimniń jaramdylyq merzimin mindetti túrde tekserý qajet.
Merzimi ótken pırotehnıkany qoldanýǵa, sondaı-aq ony balalardyń eresekterdiń baqylaýynsyz paıdalanýyna qatań tyıym salynady. Osy qarapaıym talaptardy saqtaý — bul sizdiń jeke qaýipsizdigińiz, jaqyndaryńyzdyń jáne aınalańyzdaǵy adamdardyń qaýipsizdigi.
Aıta ketelik Jańa jyl kezinde qaı jerlerde pırotehnıka qoldanýǵa tyıym salynatyny týraly jazǵan edik.