Jańa jyl qarsańynda qandaı qosymsha poıyzdar iske qosylatyny belgili boldy
ASTANA. KAZINFORM — Mereke kezinde suranys artqandyqtan birneshe baǵytta qosymsha poıyzdar júredi, dep habarlaıdy «Jolaýshylar tasymaly» AQ baspasóz qyzmeti.
Jańa jyldyq maýsymda jolaýshylar aǵyny aıtarlyqtaı ósetinin eskere otyryp, Ulttyq tasymaldaýshy suranysty tolyq qanaǵattandyrý maqsatynda qosymsha poıyzdardy iske qosyp jatyr. Bul reıster shamamen 23 myń jolaýshyny tasymaldaýǵa múmkindik beredi. Jalpy jolaýshylarǵa 53 myńnan astam oryn usynylady.
Qosymsha poıyzdar kelesi baǵyttarda qatynaıdy:
• № 201/202 «Almaty-2 — Astana-1»
Almatydan jóneltilýi: 2025 jylǵy 20, 22, 24, 26, 28, 30 jeltoqsan jáne 2026 jylǵy 2, 4 qańtar.
Astanadan jóneltilýi: 2025 jylǵy 21, 23, 25, 27, 29, 31 jeltoqsan jáne 2026 jylǵy 3, 5 qańtar.
• № 203/204 «Astana Nurly jol — Shymkent»
Astanadan jóneltilýi: 2025 jylǵy 20, 23, 26, 29 jeltoqsan jáne 2026 jylǵy 2 qańtar.
Shymkentten jóneltilýi: 2025 jylǵy 22, 25, 28, 30 jeltoqsan jáne 2026 jylǵy 4 qańtar.
• № 257/258 «Aqtóbe — Astana Nurly jol»
Aqtóbeden jóneltilýi: 2025 jylǵy 20, 23, 26, 29 jeltoqsan jáne 2026 jylǵy 2 qańtar.
Astanadan jóneltilýi: 2025 jylǵy 22, 24, 28, 30 jeltoqsan jáne 2026 jylǵy 4 qańtar.
— Poıyz quramynda standartty kýpe jáne platskart vagondary bar. Sonymen qatar, suranysy joǵary baǵyttarda poıyz quramdaryna 584 qosymsha vagon tirkeledi. Osy arqyly jolaýshylarǵa 30 myńnan astam qosymsha oryn qoljetimdi bolady. Bıletterdi bilet.railways.kz resmı saıtynan satyp alýǵa bolady, — delingen kompanııa taratqan aqparatta.
Ulttyq tasymaldaýshy jolaýshylarǵa jańa jyl qarsańyndaǵy bıletterdiń tez satylyp ketetinin eskerip, saparlaryn aldyn ala josparlap, bıletterdi erterek alýǵa keńes beredi. Eger satyp alý sátinde bos oryndar bolmasa, jolaýshylar «Kútý paraǵy» qyzmetiń tegin paıdalana alady. Bul servıs oryn bosaǵan jaǵdaıda avtomatty túrde habarlap, bıletti rásimdeýge múmkindik beredi.
Budan buryn jańa jyl qarsańynda 3 baǵytta qosymsha poıyzdar jolǵa shyǵatyny habarlanǵan edi.