Jańa jyl qarsańynda Germanııada feıerverkke suranys rekordtyq deńgeıge jetti
ASTANA. KAZINFORM – Jańa jyl qarsańynda Germanııada pırotehnıka satýshylar rekordtyq suranysqa daıyndalyp jatyr. Importtyń basym bóligi Qytaıdan keledi, dep habarlaıdy BILD
Ekonomıkalyq qıyndyqqa qaramastan, Germanııadaǵy pırotehnıka naryǵy naǵyz oljaly salaǵa aınalyp otyr. Aıtorf qalasynda ornalasqan nemistiń eń iri pırotehnıka óndirýshisi Weco Jańa jyl qarsańynda satylym kólemi artady dep kútip, saýda jelilerine ótken jylmen salystyrǵanda pırotehnıkany 10 paıyzǵa kóp jetkizip otyr.
Suranystyń artqanyn Bremerhafendegi Comet kompanııasy da rastady.
Weco Germanııa aýmaǵynda áli de pırotehnıka óndiretin jalǵyz iri kompanııa bolyp qalǵanymen, otshashýlardyń negizgi bóligi shetelden ákelinedi.
Bul baǵytta rekord tirkeldi: 2025 jyldyń qańtar–qyrkúıek aılary aralyǵynda Germanııaǵa 42 400 tonnadan astam pırotehnıkalyq buıym ımporttalǵan. Bul ótken jyldyń osy kezeńimen salystyrǵanda 62,6 paıyzǵa kóp. Resmı derekterge sáıkes, ımporttyń 98 paıyzy Qytaıǵa tıesili.
— Ótken jylmen salystyrǵanda ónim kóbirek jetkizildi, bul — nazar aýdararlyq jaıt, sebebi byltyrdyń ózi óte tabysty jyl bolǵan, — dedi BILD basylymyna bergen suhbatynda Pırotehnıkalyq ónerkásip odaǵynyń atqarýshy dırektory Klaýs Gotsen.
Germanııada feıerverkterdi satýǵa tek 29–31 jeltoqsan aralyǵynda ǵana ruqsat etiledi. Soǵan qaramastan, sala qazirdiń ózinde áserli nátıjeler kórsetip otyr: 2024–2025 jyldardyń toǵysynda aınalym kólemi rekordtyq 197 mıllıon eýro bolǵan.
Aıta ketelik Germanııada dárigerler otshashýǵa tyıym salýdy usynǵany týraly jazǵan edik.