Jańa jyl qarsańynda elordada 40-tan astam shyrsha shamyn jaqty
ASTANA.KAZINFORM — Astana qalasynda bir mezette 40-tan astam jańa jyldyq shyrshanyń shamy jaǵyldy. Soǵan oraı, qala turǵyndary men qonaqtary úshin aýqymdy merekelik is-sharalar ótti.
Merekelik shyrshalar Ortalyq saıabaqta, Ǵashyqtar parkinde, Botanıkalyq baqta, EKSPO aýmaǵynda, «Qazaq Eli» alańynda, Esil ózeniniń jaǵalaýynda, Aqbulaq boıynda, sondaı-aq «Han Shatyr», «Keruen City», «Azııa Park», «Saryarqa», «Green Mall» mańynda ornatyldy.
Qala aýmaǵyndaǵy merekelik alańdarda muz aıdyndary, syrǵanaqtar, shaǵyn sáýlet nysandary, fotoaımaqtar men túrli oıyn-saýyq alańdary ashylǵan.
Bıiktigi 25 metr bolatyn alyp shyrshalar «Astana Arena» stadıonynyń avtoturaǵynda, «Qazaq Eli» monýmenti mańyndaǵy alańda, Aqbulaq ózeniniń jaǵalaýynda jáne Botanıkalyq baqta ornatylǵan.
Sondaı-aq Ortalyq saıabaqta, Ǵashyqtar parkinde, Áıteke bı kóshesindegi alleıada, «Býharest» parkinde jáne Úrker turǵyn alabynda da jańa jyldyq shyrshalardyń shamy jaǵyldy. Qoǵamdyq keńistikter merekelik jaryq ınstallıatsııalarymen, muz aıdyndarymen, syrǵanaqtarmen, fotoaımaqtarmen jáne taqyryptyq shaǵyn sáýlet nysandarymen qulpyra túsken.
Ortalyq saıabaqta shyrshanyń shamy jaǵylǵan sátti tamashalaýshylar ishinde oraldyq stýdent Dana da bar. Ol bul shara erekshe kóńil-kúı syılaǵanyn aıtady.
— Jańa jyldy osy jerde qarsy alaıyn dep jatyrmyn. Ózimdi Astananyń bir bóligi retinde sezinemin. Shyrshanyń janǵanyn kútip, qurbylarymmen birge konkı teýip, ýaqyttyń qalaı ótkenin baıqamaı qaldyq, — deıdi ol.
Al balalarymen serýendep júrgen qala turǵyny Asanáli merekelik keshke arnaıy kelgenin jetkizdi.
— Ákem habarlama jiberip, búgin osy jerde shyrsha shamy jaǵylatynyn aıtty. Biz Almatydan kóship kelgenimizge on bes jyl boldy, Astananyń qysy endi tańsyq emes. Qazir jańa jyldy ózimiz úshin emes, balalardyń esinde qalatyndaı etý mańyzdy, — dedi ol.
Bul kúni «Green Mall», «Saryarqa», «Keruen City», «Azııa Park», «Han Shatyr» saýda, oıyn-saýyq ortalyqtarynyń mańynda jáne ózge de tanymal qalalyq lokatsııalarda da shyrsha shamy jaǵyldy.
Saraıshyk aýdanyndaǵy «Qazaq Eli» alańynda shyrsha jaǵý rásimi naǵyz ertegi álemin eske túsirdi. Munda kásibı mánerlep syrǵanaýshylar óner kórsetip, balalarǵa arnalǵan anımatsııalyq baǵdarlamalar, oıyndar uıymdastyryldy.
Sonymen qatar «Nurly Jol» temirjol vokzaly mańynda jáne Jumysshy mamandyqtar alleıasynda bıiktigi 20 metrlik jańa jyldyq shyrshalar shamyn jaqty.
Almaty aýdanynda merekelik shyrshalar Aqbulaq ózeniniń jaǵalaýynda, «Jeruıyq» saıabaǵynyń ortalyq bóliginde, Qajymuqan Muńaıtpasov kóshesindegi «Kolızeı» basketbol alańynda jáne Temirjolshylar turǵyn alabynda ornatyldy.
Baıqońyr aýdanynda 5 jańa jyldyq shyrsha «Jastar» saraıy aýmaǵynda, K.Atatúrik atyndaǵy saıabaqta, Óndiris, Kirpishti turǵyn alaptarynda jáne Qoıandy saıajaı aýmaǵynda ornatyldy.
Saryarqa aýdanynda bıiktigi 3 metrden 18 metrge deıingi 6 shyrshanyń shamy jaǵyldy. Olar Qalalyq alańda, Bógenbaı batyr dańǵyly boıyndaǵy gúlzarda, «Kóktal» saıabaǵynda, Esil jaǵalaýynda, «Naz» memlekettik bı teatry janynda jáne ıÝbıleınaıa kóshesinde ornalasqan.
Esil aýdanynda shyrshalar EKSPO aýmaǵynda, Botanıkalyq baqta, «Jetisý» saıabaǵynda, Qazaq radıosy kóshesi boıynda jáne «Baǵystan» turǵyn kesheninde ornatyldy. EKSPO aýmaǵynda 22 metrlik shyrsha, muz aıdyny men syrǵanaq ornatyldy. Al Botanıkalyq baqta 25 metrlik alyp shyrsha alystan menmundalap tur.
Aıta keteıik, muz aıdyndary, syrǵanaqtar, shaǵyn sáýlet nysandary, fotoaımaqtar men ózge de merekelik elementterdi ornatý jumysy jeltoqsan aıynyń basynda bastalǵan. Barlyq jumys kezeń-kezeńimen jeltoqsan aıynyń ekinshi onkúndiginde tolyq aıaqtalady.
Buǵan deıin Іshki ister mınıstrligi jańa jyl qarsańynda áleýmettik jelilerde arzan shyrsha satamyz dep alaıaqtyq jasaıtyndar kóbeıgenin eskertken bolatyn.