Jańa jyl qarsańynda azyq-túlik baǵasynda ózgeris bola ma

ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın jańa jyl aldynda azyq-túlik baǵasy qalaı qubylatyny týraly pikir bildirdi.

— Bul baǵytta jumys istep jatyrmyz. Byltyr jańa jyl qarsańyndaǵy kezeńdi aıtarlyqtaı qalypty ótkerdik. Bıyl da solaı bolady dep úmittenemiz. Jańa jylǵa qaraı baǵanyń ajıotajy bolady dep oılamaımyn. Jańa jyl jaqyndaǵan kezde standartty, belgili bir qymbattaý bolatyn shyǵar. Biraq jappaı ósý bolmaıdy, — dedi ol Úkimet otyrysynan keıin ótip jatqan baspasóz máslıhatynda.

Sondaı-aq, vıtse-premer qazirgi ınflıatsııanyń sebebine qandaı faktorlar áser etip jatqanyn aıta kelip, Úkimet pen Ulttyq bank qabyldaıtyn 3 jyldyq baǵdarlama sol sebepterdi joıýǵa arnalǵanyn eske saldy.

— Qazirgi ınflıatsııanyń sebepterin buǵan deıin talaı aıttym. 2026, 2027 jyldary ahýaldy túzete alamyz dep oılaımyn, — dedi Serik Jumanǵarın.

Aıta ketý kerek, búgin Úkimettiń, Ulttyq Banktiń jáne Qarjy naryǵyn retteý agenttiginiń makroekonomıkalyq turaqtandyrý jáne halyqtyń ál-aýqatyn arttyrý jónindegi 3 jyldyq birlesken is-qımyl baǵdarlamasy tanystyryldy. 

Budan buryn Jumanǵarın ishki naryqty qamtýda másele týyndasa, kartop eksportyna tyıym salynatynyn aıtty.