«Jańa jaǵdaıdaǵy jastar: is-qımyl kezeńi» respýblıkalyq onlaın jobasy iske qosylady

NUR-SULTAN. QazAqparat – 9 qarashada elimizde «Jańa jaǵdaıdaǵy jastar: is-qımyl kezeńi» respýblıkalyq onlaın jastar jobasy iske qosylady. Bul týraly QR Aqparat jáne qoǵamdyq damý mınıstrliginiń jastar jáne otbasy isteri komıtetiniń tóraǵasy Shahmardan Baımanov málim etti, dep habarlaıdy QazAqparat tilshisi.

«Prezıdent tapsyrmasyna sáıkes jastardyń tsıfrlyq jáne kásiptik bilim deńgeıin arttyrý, sporttyq-shyǵarmashylyq áleýetin damytý máselelerin nazarǵa alyp otyrmyz. Osy maqsatta 9 qarasha men 8 jeltoqsan aralyǵynda QR Aqparat jáne qoǵamdyq damý mınıstrliginiń qoldaýymen «Qazaqstan jastarynyń kongresi» ZTB uıymdastyrýymen «Jańa jaǵdaıdaǵy jastar: is-qımyl kezeńi» respýblıkalyq onlaın jastar jobasyn júzege asyrý josparlanyp otyr. Bul jobanyń negizgi maqsaty – jastardy jańa bolmys jaǵdaıynda biriktirý, zııatkerlik qabileti men tulǵalyq kapıtalyn damytý, sonymen qatar daǵdylaryn shyńdaýǵa, jańa qyrlaryn ashýǵa, kásipkerlik, volonterlik qyzmetin damytý úshin jaǵdaı jasaý», - dedi Shahmardan Baımanov OKQ-da ótken baspasóz máslıhatynda.

Onyń aıtýynsha, bıyl bul baǵyttaǵy onlaın sharalardyń birshamasyn onlaın formatta ótkizý josparlanǵan.

«Sondyqtan qazirgi kúrdeli jaǵdaıdy eskere kele respýblıkalyq onlaın jastar jobasyn júzege asyrýdy jón dep sanadyq», - dedi ol.

Komıtet basshysy «Jańa jaǵdaıdaǵy jastar: is-qımyl kezeńi» respýblıkalyq jobasy dástúrli shara ekenin eske saldy.

«2018 jyly «Zerendi» respýblıkalyq bilim lagerinde joba uıymdastyrylǵan. Sodan beri úshinshi ret ótkizilgeli otyr. Jobaǵa úsh jyldyń kóleminde belsendi jastar qatysqan», - dedi ol.