Jańa Zelandııadan kelgen sarapshy COVID-19 kúresýdiń tájirıbesi týraly aıtty

ALMATY. QazAqparat – S.Asfendııarov atyndaǵy Qazaq ulttyq medıtsınalyq ýnıversıteti ótkizgen onlaın konferentsııa barysynda sheteldik mamandar koronavırýspen kúreste jınaqtaǵan tájirıbelerimen bólisti, dep habarlaıdy QazAqparat tilshisi.

Jıynda Jańa Zelandııanyń Vellıngton qalasyndaǵy Otago ýnıversıtetiniń professory Maıkl Beıker COVID-19 ben kúreste birinshi medıtsınalyq-sanıtarlyq kómek júıesi qalaı uıymdastyrylǵanyn aıtyp berdi.

Onyń aıtýynsha, pandemııanyń damýy túrli stsenarıılerge baılanysty ózgerip otyrady. Sondyqtan, ár eldiń densaýlyq saqtaý júıesinde túrli jaǵdaıǵa daıyndyq jasalýy kerek.

Pandemııa bastala salǵan kezde Jańa Zelandııa mamandary adam ólimi 0,3 paıyz bolady dep josparlaǵan.

«Bul tumaýdan birneshe ese qaýipti vırýs ekeni basynan-aq baıqaldy. Qańtarda jahandyq pandemııa bolatyny anyq boldy. Aqpanda Qytaıdyń málimetterin taldaı kele pandemııany aýyzdyqtaýǵa bolatynyn túsindik. Naýryz aıynda vırýs Jańa Zelandııaǵa da kele bastady. El bıligi resýrstardyń shekteýli bolýyna baılanysty, testilerdiń jetispeıtinin túsingen soń lokdaýn týraly sheshim qabyldady. Bul juqtyrý tizbegin úzý úshin kerek boldy. Aqpan naýryzda ǵalymdar arnaıy strategııa qurdy. Qujatqa sáıkes koronavırýstyń 19 yqtımal jaǵdaıynda lokdaýn jarııalaý qolǵa alyndy», - dedi Beıker.

Onyń aıtýynsha, týrıstik el bolyp sanalatyn Jańa Zelandııaǵa kelýshilerdiń sany táýline 15 myńnan 500-ge deıin azaıǵan.

Tipti eshkim kelmegen, eshkim shyqpaǵan kúnder de bolǵan. Bul - eldiń tarıhynda bolmaǵan jaǵdaı.

5 mln halyq arasynda táýligine 20 myń adamǵa deıin test tapsyrǵan. Bul da el tarıhynda birinshi ret bolǵan jaǵdaı.

«Barlyq halyq 7 apta úıinde otyrdy. Bul sharanyń arqasynda elde vırýs joıyldy. Jańa Zelandııa – vırýstan taza elge aınaldy. 5 mln adamnyń ishinde 29 adam vırýstan kóz jumdy. Lokdaýn kezinde ólim jitim kórsetkishi, men tumaý tııý oqıǵadary tirkelgen joq», - dedi sarapshy.

Lokdaýn kezinde elde ekonomıkada qysqartý, ońtaılandyrý qolǵa alynǵan. Alaıda jumys oryndaryn qysqartý tirkelmedi.

Jaqynda el ekonomıkasy burynǵy áleýetine qaıta oralady dep boljanyp oytr.

Aıta ketý kerek, ǵylymı konferentsııa akademık, ǵalym Qazaqstan Taǵamtaný ınstıtýtynyń prezıdenti Tóregeldi Sharmanovtyń 90 jyldyq mereıtoıyna arnap uıymdastyryldy.