Jańa Zelandııada úsh kún toqtaýsyz jaýǵan nóserden tórt adam qaza tapty

ASTANA. QazAqparat – Jańa Zelandııanyń Oklend qalasynda úsh kún jaýǵan nóser jaýyn tasqynǵa ulasyp, sonyń saldarynan mert bolǵandar sany tórt adamǵa jetti, dep habarlaıdy QazAqparat RBK portalyna silteme jasap.

Buǵan deıin úsh adamnyń qaza tapqany belgili bolǵan, tórtinshisi Onevero aýylyna jaqyn mańnan tabyldy. Onyń denesin aǵyn sý alyp ketken. Polıtsııa málimetinshe, tórtinshi adam – er azamat, ony dronnyń kómegimen sońǵy ret kórgen jerden tómenge qaraı 1 shaqyrym qashyqtyqtan tapqan.

Jańa Zelandııada úshinshi táýlik qatarynan nóser jaýyn toqtamaı jatyr, Oklend, Koromandelıa, Izobılııa aılaǵy zardap shekti. 27 qańtarda Oklend bıligi tótenshe jaǵdaı jarııalady. Taýrangada úı qulap, turǵyndary evakýatsııalandy. Te Pýke mańynda taýar tıelgen poıyz relsten shyǵyp ketken, Vaıkato aýdany men Izobılııa aılaǵynda birneshe jol jabyldy. Jalpy, Oklendte sý tasqyny saldarynan 45 jol jabylǵan. 2 myńnan asa qala turǵyny kómekke júgingen, 70 adam evakýatsııalandy.

Jergilikti aýa raıyn boljaý stantsııalary Oklendtegi kún raıy seısenbi, 31 qańtarǵa deıin nasharlaı beretinin eskertti. Toqtaýsyz jaýyn jaýyp, jańa tasqyndar bolýy múmkin.

«Klımattyń ózgerýi jaýyn-shashynnyń jıileýine jáne olardyń qatty jaýýyna áser etti. Degenmen, olardyń áseri ár aımaqta ártúrli», - dep málimdedi Jańa Zelandııanyń Klımat ózgerýi boıynsha mınıstri Djeıms Shoý.

Foto: autospynews.net